Guadalupe nag-una ron sa mga kaso sa dengue

CEBU, Philippines - Nag-una na usab karon ang barangay Guadalupe sa kabarangayan sa dakbayan sa Sugbu nga dunay labing daghan og kaso sa dengue base sa labing uwahing talaan nga gipagawas sa City Epidemiology Surveillance and Statistics Unit (CESSU) sa City Health Department.

Ang nahisgutang barangay duna nay 67 ka dengue cases ug duha na ang nakalas sukad sa buwan sa Enero hangtud niadtong Agosto 31.

Mas dako hinuon ang Guadalupe itandi sa ubang barangay sa siyudad nga nalakip sa top five barangays sa pinakadaghan og dengue cases.

Apan matud ni Kapitan Eugenio Jingjing Faelnar sa barangay Guadalupe nga kini wala nila himoang rason nga pasagdan na lang ang nahisgutang makamatay nga sakit.

“Wala gyud namo na pasagdi, kada adlaw mi nga mopahigayon og mist spraying, naa pa gyu'y mga pulong-pulong pag-edukar sa mga molupyo,” sumala ni Faelnar.

Gani miingon ang kapitan nga nagduda na ang ubang molupyo sa ilang barangay nga manakod ang nahisgutang makamatay nga sakit.

“Nagduda sila nga manakod nang sakita kay human kuno sa usa, naa na pod kunoy hilantan sa ilang sakop sa pamilya,” dugang pamahayag ni Faelnar.

Ang kapitan nga mao usab ang ABC president sa siyudad padayong miawhag sa ilang mga residente ug sa ubang molupyo sa dakbayan nga kanunay'ng manglimpyo.

Partikular na niini ang pagyabo sa napundong tubig aron walay kaitlugan ang mga lamok nga nagdala sa dengue nga mikalas na og ubay-ubay'ng kinabuhi niining tuiga.

Nagsunod sa Guadalupe nga dunay labing daghan og dengue cases mao ang barangay Camputhaw nga dunay 60 ka kaso ug tulo na ang patay.

Kini gisundan usab sa barangay Talamban nga dunay 50 ka dengue cases ug usa ang wala matabang sa mga mananambal ug namatay.

Naglangkob sa top five barangays mao ang Labangon nga dunay 46 ka kaso ug tulo ang patay samtang 45 usab ka dengue cases sa barangay Basak San Nicolas ug usa ang patay.

Sa kinatibuk-an, ang CESSU nakatala na og 895 ka dengue cases sa siyudad sukad sa buwan sa Enero hangtud niadtong Agosto 31 ug 23 niini ang nakalas.

Kini mas ubos hinuon itandi sa mga kaso sa susamang period sa miaging tuig nga dunay 919 ka dengue cases ug 38 ang wala matabang sa mga mananambal ug namatay. – BANAT NEWS