PAF nagsaulog sa ika-41 nga founding anniversary

CEBU, Philippines -  Gipasidunggan sa 560th Air Base Wing (ABW) sa Philippine Air Force (PAF) ang 17 ka mga opisyal ug inlisted personnel sa militar ug civilian nga dako og natabang sa operasyon sa PAF ug sa mga programa sa komunidad dinhi sa Visayas region.

Atol sa ika 41 nga founding anniversary sa 560th ABW sa PAF sa Mactan Benito Ebuen Airbase kagahapon sa buntag, personal kining gitambongan ni PAF Commanding General Lt. Gen. Oscar Hernandez Rabena sa Armed Forces of the Philippines (AFP), 2nd Air Division Commander Lt. Gen. Nathaniel Legaspi ug ang Wing Commander sa 560th ABW nga si Brig. Gen. Edgardo Mendoza AFP.

Gipasalamatan sa maong mga opisyal ang mga mga civilian awardees sa mga tabang nga ilang gihatag sa mga kalihokan sa PAF ilabina ang alang sa mga civilian nga nagkinahanglan sa tabang gikan sa PAF.

Matud pa ni Lt. Gen. Rabena nga ang maayong relasyon tali sa militar ug sa mga civilian maoy usa sa mga paagi nga mahibalik ang pagsalig sa mga katawhan ngadto sa mga militar ug yawe usab kini sa kalinaw sa nasud.     Hinungdan nga ang tema sa ilang anibersaryo karong tuiga mao ang " 560th ABW at 41: Instep with team AFP towards a more secure, safer, cleaner and more progressive Visayas".

Ang mga awardee mao ang mosunod: sa Military Merit Medal naangkon nila ni Lt. Col. Alfredo Senosa ug A1C Henry Estrada.

 Military Commendation Medal, naangkon ni 1LT Cyrus Neoman dela Cruz ug Sgt. Rico Capuno.

Plaque of Recognition diin ang Officer of the year mao si Capt. Felix Montañez, NCO of the Year TSgt. Jimmy Campitan, Airmen of the Year A1C Benjied Abringe, Civilian Employee of the Year Mrs. Evelyn Kidlat, Group of the Year 562nd Logistics Group ug Squadron of the Year mao ang 5622nd Motor Vehicle Squadron.

Nakadawat usab og pasidungog ang Philippine State College of Aeronautics (PHILSCA- MBEAB) pinaagi ni Dr. Nonadel Soriano ang Campus Director gumikan sa pagmintenar sa kalimpiyo sa palibot sa maong tunghaan ug sa suporta sa mga kalihokan sa PAF ngadto sa mga Civilian.

Lakip sa nakadawat og pasidungog mao si Lapulapu City Mayor Atruro Radaza sa paghatag og gahin alang sa pagpalambo sa kadalanan sulod sa Air Force Base, MCIAA Gen. Manager (Ret) BGen. Danilo Francia, (Ret) Gen. Rodante Joya, ACDI Branch Manager Mrs Rosielani Grefalda, Capt. Adan Rose ang Base Chaplain ug A1C Benjied Abringe. - Bong Soriano (BANAT NEWS)