Comelec uyon oras sa rehistrasyon lugwayan

CEBU, Philippines -  Dili supak ang duha ka mga election officer sa dakbayan sa Sugbu nga lugwayan ang mga oras sa pagpangrehistro sa bag-ong mga botante bisan pa man kung gihulagway nilang Attorney Marchel Sarno ug Attorney Edwin Cadungog nga kini wala pa kinahanglana niining higayuna.

Matud sa duha ka election officer nga kung dunay kamanduman sa ilang uluhang buhatan alang sa extension, kini andam nilang sundon.

“Kami mo-follow man gyud whatever decisions sa Comelec en banc, kinahanglan pa hinuon na og resolution,” nagkanayon si Sarno.

Ang pamahayag ni Sarno gidasunan usab ni Cadungog samtang nagkaduol na ang deadline sa continuing registration karong Oktobre 31.

Nakapanglantaw si Cadungog nga sa sunod buwan, musugod na usab pagdaghan ang mga botante nga magparehistro sa mga buhatan sa Comelec.

“Mao man gyud na atong kinaiya, pangkatapusan, kung mao nay mahitabo mas maayo nga karon magsugod na ta og extend sa atong oras,” sumala ni Cadungog.

Nasayran nga dunay pending request sa Comelec-Manila pag-uswag og duha ka oras sa registration tungod sa ubay-ubay’ng mga botante nga magparehistro.

Kini gikan sa alas 8:00 sa buntag hangtud saalas 5:00 sa hapon ngadto na sa alas 7:00 sa kagabhion aron makaparehistro ang uban ilabi na niadtong dunay trabaho.

Gawas niini gikataho usab nga ang ubang election officer sa nasud, nipadangat og susamang request ngadto sa ilang uluhang buhatan.Tungod niini, gikonsiderar sa Comelec-Manila ang maong hangyo ug posibleng kini mahatagan og katumanan sa hinapos nga bahin niining buwana.

Ang Migrante International ingon man ang youth group nga Kabataan, una nang nihangyo sa Comelec nga i-extend ang registration hangtud sa buwan sa Disyembre.

Butang nga dali usab nga gibasura sa Comelec tungod usab sa himuong preparasyon sa maong buhatan pagpatuman sa poll automation sunod tuig. - Elly Bolonos (BANAT NEWS)