Gungob aksyonan sa Ombudsman

CEBU, Philippines - Si Deputy Ombudsman for the Visayas Pelagio Apostol mipasalig nga himoan nila og dinaliang aksyon kining   nagpadayon nga illegal nga pagpanghakot og yuta nga gipasiugdahan mismo ni Mayor Avelino Gungob sa Consolacion.

Kini human ipadangat ngadto sa estasyon DyRF ang reklamo sa pipila ka mga tag-iya sa lote nga gikubkoban og yuta ug mga bato nga gipangulohan ni kanhi vice mayor Nene Alegado, ang kasamtangang presidente sa Grains Retailer Confederation of the Philippines (GRECON.)

Si Alegado nagkanayon sa interview sa DyRF nga niadtong nakalabay nga adlaw, giguba sa mga tawo ni Mayor Gungob ang ilang koral sa yuta bisan pa man og migawas na ang desisyon sa korte nga nagbasura sa expropriation proceeding sa lungsod sa Consolacion tungod kay walay igong pundo ang lungsod nga sarang ikabayad sa gi-expropriate nga luna aron himoan sa quarry operation sa mayor nga giingong walay pagtugot sa DENR.

Matud pa ni Alegado nga gipadad-an ang iyang pamilya og daghang mga police ug mga traffic enforcer dihang ila kining gipaundang, apan ila kining nakonbinse nga dili manghilabot aron dili mapasakaan og kaso.

Kini ang hinungdan nga nangunay gyud si Mayor Gungob pag-adto aron sa pagguba sa ilang koral ug gikubkob gyud ang ilang lote bisan kun walay pagtugot gikan sa Mines and Geo-Sciences Bureau (MGB) sa DENR.

Tungod niini si Apostol mipasalig nga dalion nila ang pag-imbestigar niini sugod kagahapong adlawa ug mohimo dayon og pakisusi aron mapakgang ang giingong illegal quarrying sa mayor sa lungsod sa Consolacion.

Dugang pa ni Apostol nga mahimong mas modako pa ang kadaut nga mahimo sa mayor sa lungsod sa Consolacion kun ipadayon ang iyang kalihokan bisan kun kini illegal. – BANAT NEWS