CEBU, Philippines - Mga residente sa sitio Kalmar barangay Lawaan I, dakbayan sa Talisay ang nagkagubot kagahapon sa buntag tungod sa giingong planong pagpatukod og mga balay diha taliwala sa basketball court sa usa sa mga residente sa lugar kinsa nangangkong presidente sa pikas grupo sa asosasyon sa urban poor.
Si Kapitan Jerson Laceda sa pakighinabi niini sa Banat News mibutyag nga dunay nahitabong kaguliyang diha sa sitio Kalmar tungod sa usa ka Estrella Bas nga nagsukod-sukod diha sa taliwala sa basketball court kay giingong nagplano kining patukoran og mga balay sa iyang mga sakop.
Apan ang mga dili sakop sa kahugpungan ni Bas nangreklamo ug mibabag sa iyang plano.
Matud ni Laceda nga ang nahisgutang lugar usa ka squatters area apan gipatukoran kini og basketball court sa siyudad aron dunay kalingawan ang mga batan-on ug dili kini matumpawak sa bisyo.
Kahinumduman nga kaniadto si Bas ang nangangkong presidente sa Kalmar Urban Poor Community Association (KUPCA) apan gipasakaan kini og kaso sa mga kanhi niya miyembro sa giingong pagpangolekta niya og salapi nga walay klarong resibo ug audit kung asa na paingon ang kwarta nga pundo sa asosasyon.
Tungod sa maong iregularidad dunay mga sakop niyang mibuwag ug nagtukod og laing grupo nga Lawaan Urban Poor Association (LUPA) kinsa si Nenita Monasterio maoy presidente niini karon.
Ang LUPA accredited na kini sa Security and Exchange Commission (SEC) ug sa uban pang mga ahensiya nga naghimo kining legal.
Si Laceda nagkanayon nga sa nahisgutang kaguliyang misumbong siya niini ngadto sa mayor ug gikatakda karong ang mayor makigkita kang Bas kabahin sa maong problema. – BANAT NEWS