P500 multa sa irong binuhian

CEBU, Philippines - Pamultahon na kadtong mga tawong masakpang pamuhian ang ilang mga iro ilabina kun makapaak dayon magdumili pagtubag sa responsibilidad.

Dunay multa nga P500 ang tag-iya kun buhian ang ilang mga iro ug laing P25 mil nga multa kun ang tag-iya magdumili pag-abaga sa medical expenses sa higayon makapaak og tawo ang ilang binuhi.

Si Konsehal Edgardo Labella nagplanong amendahon niini ang existing anti-rabies ordinance nga naglakip sa pagpahamtang og multang P2 mil niadtong tawong magdumili pagpa-rehistro ug pagpa-immunized batok sa rabies sa ilang mga iro. Gawas pa niini, nidugang ang konsehal nga sa higayon makapaak ang ilang iro, ang gobiyerno pinaagi sa City Hall’s Department of Veterinary Medicines maoy awtomatikong mokustodiya sa iro alang sa obserbasyon.

Apan kun ang tag-iya sa maong iro magdumili usab pagtahan sa ilang binuhi ila kining pamultahon og P10 mil, patas-an usab ang impounding fee sa mga hayop nga madakpan gikan sa P300 ngadto sa P500 ug P1000.

Ang city veterinary nga si Alice Utlang mipadayag og suporta sa konsehal kay aron maminosan ang gidaghanon sa mga tawong napaakan og iro dinhi sa siyudad.

Ang mga personnel sa Department of Veterinary Medicines moisyu og citation tickets niadtong mga nanag-iya og iro ug makig-alayon usab sila sa mga barangay officials pag-abag sa ilang kampanya batok sa rabies.

Matud ni Labella nga tungod sa kadaghan na sa namuyo dinhi sa dakbayan, nagkadaghan usab ang namuhi og iro ug iring nga gihulagway niining delikado kaayo kun makapaak og tawo.

Sa nasayran nga ang rabies gikonsiderar sa tibuok kalibotan nga maoy ika-dose nga killer disease. ( Gikan sa The Freeman)   (BANAT NEWS)