Ombudsman naningil sa COA report sa CICC

CEBU, Philippines - Ang buhatan sa Office of the Ombudsman— Visayas naningil na ngadto sa Commission on Audit (COA) sa gipangayo niining COA findings labot sa giingong anomaliya sa pagpatukod sa Kapitolyo sa dul-an sa P1 bilyon nga Cebu International Convention Center (CICC) sa dakbayan sa Mandaue.

Ang Ombudsman Visayas mipadala sa ikaduhang sulat ngadto sa buhatan ni COA-7 regional director Delfin Aguilar nga naghangyo nga ihatod na sa Ombudsman ang audit report sa pagtukod sa CICC.

Kini tungod sa kapakyas sa pagtubag sa ilang unang request nga gipadala sa buhatan sa Ombudsman niadto pang tuig 2007.

Si Graft Investigator Rod Blazo nga maoy nangulo sa pag-imbestigar sa maong kaso nagkanayon nga nahuman na ang ilang imbestigasyon ug andam na   alang sa   resolusyon.

Apan iyang gitataw nga dili makumpleto ang imbestigasyon sa Ombudsman kun dili nila madawat ang finding sa COA tungod kay ang resulta unya sa maong kaso magsalig man sa audit report gikan sa COA.

Gitataw niini nga wala yak-i sa Ombudsman ang ilang imbestigasyon labot sa CICC tungod sa kalangay sa paggawas sa resulta sa imbestigasyon tungod kay daw nagdikidiki sa paghatag og mga dokumento ang mga opisyales sa COA.

Usa sa mga senior auditor sa buhatan ni Aguilar nga dili lamang magpaila kay dili otorisado pagluwat og mga pamahayag nagkanayon nga nahuman na nila ang maong audit.

Apan gitataw niini nga dili lamang siya makaseguro kun nakapadala na sila og kopya sa maong mga dokumento nga gipangayo sa Ombudsman. - Chester Abadilla (BANAT NEWS)