Di tanang libud-suroy may rabies - Utlang
CEBU, Philippines - Nakonsensya na ang Department of Veterinary Medicine and Fisheries (DVMF) sa Cebu City Hall sa pagsige og pamatay sa libudsuroy nga mga iro dinhi sa siyudad human nila masayri sa pagtuon nga sagad sa rabies di makuha sa mga libudsuroy nga mga iro.
Kini maoy giangkon sa labaw sa DVMF nga si Doctor Alice Utlang human usab sa libuan na ka mga iro nga ilang na-euthanized sulod na sa pipila ka katuigan.
Gani niadtong miaging tuig, ang DVMF nakapatay og kapin sa 7,600 ka iro nga nahipos gikan sa nagkalain-laing barangay sa dakbayan.
Matud pa ni Utlang nga nasuta sa ilang gihimong pagtuon nga kasagaran sa rabies cases sa siyudad wala magagikan sa libudsuroy nga mga iro.
“Nakonsensya ko kay base sa atong data most of our rabies cases dili man gikan sa stray dogs mostly house dogs man, ang ila ra gyung sala kay nagsuroy-suroy sila,” sumala ni Utlang.
Nagkanayon ang labaw sa DVMF nga kini maoy hinungdan nga selective na ang ilang gihimo karon nga pagpatay sa mga stray dogs.
Nasayran hinuon nga niabot gihapon og 1,499 ang na-euthanized sa DVMF sukad sa buwan sa Enero hangtud niadtong miaging buwan sa Hunyo niining tuiga.
Sa pikas bahin gipahibawo ni Utlang nga nihunong una ang operasyon sa DVMF pagpanakop sa libudsuroy nga mga iro dinhi sa siyudad. - BANAT NEWS
- Latest
- Trending
