CEBU, Philippines - Gisalikway sa environmentalist nga si Atty. Gloria Estenzo Ramos ang awhag ni Gobernador Gwendolyn Garcia nga bakwion niini ang giluwatang pamahayag sa media nga naghulagway nga voided ang titulo sa Balili property sa Tinaan, Naga nga gipalit sa lalawigan sa Sugbu sa kantidad nga P98 milyones.
Si Garcia miawhag kang Ramos pagbakwi sa pamahayag niini human pabiling limpyo ang titulo gawas lang nga dunay plano nga ipaubos sa revision proceeding sa walo ka lote niini nga timberland kun naglubog sa tubig apan wala pa maaprobahi.
Apan gipasabot ni Ramos subay sa giluwatang press statement kagahapong adlawa nga resulta lang ang mao niyang nahaunang pamahayag sa kakuwang og komunikasyon sa buhatan sa gobernador ngadto nilang mga environmentalist advocates ug sa publiko.
Gikasubo usab ni Ramos ang sitwasyon nga ang mga sakop sa media pa maoy magsilbing mensahero sa gobernador ngadto sa mga konstituwenti niini.
Gidugang ni Ramos nga dili unta mahitabo ang maong sipyat sa iyang giluwatang pamahayag sa estado sa titulo sa maong luna kun misanong pa dayon paghatag sa gipangayo nilang mga dokumento ang gobernador sama sa Deed of Sale ug uban pa.
Matud ni Ramos nga subo kaayong paminawon nga diha na mohatag og kopya sa mga dokumento ang gobernador sa dihang mipasaka na sila og reklamo sa Ombudsman tungod sa Anti Red Tape Act of 2007 nga nagtugot sa publiko nga makapangayo og public records sa mga opisyal sa gobiyerno.
Nagkanayon hinuon si Ramos nga duna pay daghang angay tubagon ug angay hatagan og katin-awan ang gobernador sa maong kontrobersyal nga pagpalit sa Balili property ug giawhag niya ang mga stakeholders nga magtambayayong pagpanghipos og dugang pang impormasyon sa maong isyu aron makatabang sa imbestigasyon sa Ombudsman Visayas. - Darrel A. Carumba (BANAT NEWS)