3 bata patay sa dengue

CEBU, Philippines - Bisan pa man sa kampanya sa dakbayan sa Sugbu batok sa sakit nga dengue tulo na usab ka mga bata ang nakalas sa maong sakit dinhi sa dakbayan sugod niadtong petsa 15 hangtud niadtong milabay'ng adlaw'ng Lunes.

Ang labing uwahing namatay mao sila si Carl Osmeña, 6-anyos, taga Basak-San Nicolas; Hansel Umbaad, 3-anyos nga taga Mahayahay, Carreta ug ang labing uwahi kagahapon mao ang 8-anyos nga si Mary Ellen Labra nga taga Juana Osmeña.

Ang duha ka mga bata gawas lang ni Osmeña (wala pa maestablisar ang relasyon ngadto sa mayor) anha gipatambalan sa Cebu City Medical Center samtang si Osmeña diha sa Perpetual Succour Hospital.

Si Osmeña gikatahong nalandig diha sa   pribadong tambalanan niadtong Agosto 13 ug nianang pagka-petsa 15 nakabsan kini sa kinabuhi samtang si Umbaad nalandig sa CCMC nianang adlaw'ng Lunes ug namatay niadtong pagsunod adlaw.

Si Labra nalandig usab sa CCMC nianang adlawa nga namatay si Umbaad apan kagahapon namatay usab kini.

Sumala pa sa report sa City Epidemiology Statistics and Surveillance Unit sukad pa niadtong Enero ning tuiga hangtud ning bulana duna nay natalang 676 ka mga kaso sa dengue sa dakbayan apan mas gamay kini kun itandi sa susamang period sa milabay'ng tuig nga 898 ka kaso.

Nakatala usab og 19 na ang namatay sa maong sakit niining tuiga kumparar sa milabay'ng tuig nga 37 ka mga tawo ang nakalas.

Sumala pa sa CESSU, 52.3 porsiyento sa mga natakbuyan mga lalaki ug sagad nagsugod sa edad nga lima pa ka buwan hangtud sa 70-anyos.

Napulo ka mga barangay sa dakbayan ang maoy dunay daghang kasong natala niini ug nag-una niini mao ang Kamputhaw nga may 55 ka kaso ug duha na ang namatay.

Gisundan sa Guadalupe nga may 48 ka kaso ug duha usab ang patay; Talamban 35 ka kaso ug usa ka patay; Basak-San Nicolas 33 ka kaso ug may usa ka namatay; Labangon 32 ka kaso ug tulo ang namatay; Bario Luz 30 ka kaso; Lahug 30 ka kaso; Punta Princesa 27 ka kaso; Tisa 26 ka kaso ug usa ang patay; Lorega 22 ka kaso ug duha ang namatay.

Ang tulo ka mga nag-unang barangay ug ingon ang Tisa parehong dunay tagsa ka nakalas nga pasyente niini lang bulana samtang ang Guadalupe maoy dunay labing daghang natalang kaso niining bulana.

Nunot niining bag-ong nakalas nga mga pasyente diha sa CCMC buot sa mayor nga dunay himuong imbestigasyon kun dunay nagpabaya ba ang mga doctor sa maong pasilidad.

Ang maong tambalanan dugay nang buot nga pasirad-an sa mayor gumikan sa mga reklamong iyang nadungog nga dili maayong serbisyong nadawat sa mga konstituwente sa dakbayan.

Butang nga gipanghimakak sa mga doktor ug ning bag-uhay lang nanawagan silang dili lang mag-apil apil ang mga politiko diha sa ilang trabaho aron sila makaserbisyo og maayo.

Kagahapon walo ka mga ginikanan sa mga batang nasakit og dengue ang mipatim-aw sa buhatan ni Mayor Tomas Osmeña ug mipadangat sa ilang pamahayag kabahin sa pag-atiman kanila sa mga doctor sa CCMC.

Sagad kanila mitug-an nga maayo ang pag-atiman kanila sa mga doctor apan ang kakulangon sa mga personnel nga makaatiman dayon kanila maoy usa sa ilang nasinating problema.

Si Osmeña sa iyang bahin mibutyag nga bukas siya kaayo pagdugang og doktor sa maong tambalanan apan walay bisan usa nga formal request nga midangat sa iyang buhatan. - Ug report gikan sa The Freeman (BANAT NEWS)