Video footage ni Vice Mayor Fortuna sa padayong operasyon sa Umapad gipagawas

CEBU, Philippines - Human mogawas ang report gikan sa Department of Environment and Natural Resources-7 nga pabiling nag-operate ang dumpsite sa barangay Umapad, si Mandaue City Vice Mayor Carlo Pontico Fortuna mipagawas og video footage kagahapon nga nagpakitang duna pa gyu'y mga dumptrucks nga naglabayan og basura sa maong dapit.

Si Fortuna sa gipatawag nga press conference niini diha sa report sa Balitang Bisdak mipakita sa maong video footage ug mikwestyon nganong duna pay mga susamang pagpangtambak og basura kun tinud-anay pang gipasirad-an na kini ni Mayor Jonas Cortes.

Nagtuo si Fortuna nga wala pa mabahig-bahig ang basura subay sa waste segregation program nga gipatuman karon sa gobiyerno nga mao say dakong problema karon sa mga local government units.

Ang DENR regional coordinator nga si Amancio Dongcoy sa milabay'ng sesyon sa konseho sa Mandaue gikatahong mibutyag nga bukas pa gihapon ang maong dumpsite sukwahi sa pangangkon sa mayor.

Kini base usab sa wala pagsunod sa dakbayan sa tukmang proseso sa DENR pagpasira sa usa ka karaang dumpsite susama sa pagbutang og dike alang sa duga sa basura; kural, pagtabon og graba ug yuta ug uban pa sumala pa ni Majority Floor Leader Victor Biaño sa report sa The Freeman kagahapon.

Dili palang dugay si Cortes nakadawat og pasidungog gikan sa 888 News Forum niadtong Agosto 9 gumikan sa giingong kalampusan sa waste segregation program nga gipatuman sa dakbayan nga giingong maoy nakaingon nga mimenus og maayo ang gidaghanon sa basurang iglalabay sa dakbayan.

Si City Administrator Briccio Boholst sa susamang report mipasabot nga ang mga nakitang gipangtambak nga basura nga gireklamo mga “residual waste” kon mga salin-salin nalang tungod kay wala nay kabutangan.

Nanawagan karon ang kampo ni Fortuna ngadto ni Cortes nga ipauli ang nadawat niining pasidungog.

Apan si Boholst sa susamang report misaway niini ug mihulagway nga di kini angayang ipamulong sa usa ka halandong opisyal sa dakbayan. “It is uncalled for,” asoy pa ni Boholst sa maong report. Ang maong basurahan gihulagway sa DENR nga peligrosong maka-pollute sa kadagatan sa Mactan Channel ilabi na nga kini anha mahimutang duol sa mga fishponds sa maong dagat. (Edwin Ian Melecio)   BANAT NEWS)