P500 mil naugdaw sa sunog sa Talisay - 2008

CEBU, Philippines - Mikabat ngadto sa P500 mil ang danyos sa mga nahitabong sunog sa dakbayan sa Talisay sulod sa unang quarter sa milabay’ng tuig kini base sa talaan sa city fire department.

Niadtong buwan sa Enero-Marso, 2008 tulo ka insidente sa sunog ang tungod sa bonfire, open flames ug sparks.

Ang nahisgutang sunog sa tuig 2008 pulos mga accidental fire o dili tinuyo ug ang mga nasunog duha ka edipisyo ug usa ka sakyanan diin lima ka tawo ang naangol apan walay natala nga dunay naapil nga bombero.

Sa buwan sa Abril-Hunyo sa milabay’ng tuig walay nakatalang insidente sa sunog apan sa maong mga buwan niining tuiga upat ka insidente sa sunog ang nahitabo.

Si Talisay City Fire Marshal Felipe Canillas sa pakighinabi niini sa Banat News nagkanayon nga matag tuig ang Bureau of Fire and Protection (BFP) ang magpahigayon og mga kalihukan ngadto sa mga tunghaan ug kabarangayan kabahin sa fire safety measures.

Apan gawas sa mga fire safety measures ang BFP ang mopahigayon usab og mga earthquake drills, susihon usab sa kabomberohan ang mga fire hydrants kung wala ba kini depekto aron kung ugaling dunay mga mahitabong sunog dili sila maproblema.

Si Canillas midugang nga usa sa mga problema atol sa ilang pagtubag sa sunog mao ang mga gagmay’ng karsada sa mga lugar ug ang kadaghanan sa mga ususero hinungdan nga dili sila makasulod og dali sa lugar diin dunay masunog. (Brenda Batuto)   (BANAT NEWS)