CEBU, Philippines - Nakuhaan og armas sa kapolisan sa dakbayan sa Mandaue ang usa ka tinun-an sa high school human sa ginukdanay nga nahitabo sa Zone Kamansi, barangay Paknaan dakbayan sa Mandaue kagahapon sa kaadlawon.
Ang nasikop mao si Jaysorey Paul Pepito, 19, residente sa barangay Yati lungsod sa Liloan, usa ka tinun-an sa ikaduhang ang-ang sa sekondarya.
Matud pa ni PO2 Ranjie Lopez sa kapolisan sa Station 3 sa MCPO nga samtang nagpahigayon og patrolya ang ilang hepe sa Station 3 nga si Sr. Insp. Rex Lomente ilang nasigpatan ang grupo sa mga batan-on hinungdan nga ila kining giduol.
Sa dihang duol na ang patrol car kalit midagan si Pepito pahilayo sa iyang mga kauban hinungdan nga ilaha kining gigukod ug misuway kini sa pagbunot sa iyang gidalang armas apan nadakpan.
Nakuha gikan sa posesyon ang usa ka kalibre .38 nga dunay unom ka buhing bala nga walay mga dokumento.
Atol sa imbestigasyon si Pepito nangangkong iyaha kining gidala aron pagpanalipod sa iyang kaugalingon apan mihimakak kining sakop siya og fraternity o gang. (Bong Soriano) (BANAT NEWS)