CEBU, Philippines - Gitumbok sa environmental lawyer nga si Atty. Benjamin Cabrido Jr. nga dili gikan sa kasingkasing ang pagpangayo og pasaylo ni Governor Gwendolyn Garcia sa mga lapsong nahimo sa pagpalit sa lote sa Balili Beach, sa Barangay Tinaan, lungsod sa Naga nga naklarong 80 porsiyento ang nalupog sa tubig dagat ug kabakhawan.
Matud pa ni Atty. Cabrido nga ang gihimo ni Garcia dili gyud tinuoray nga admission of guilt tungod kay taas gihapon kaayo ang iyang tingog.
Kun sa rules of evidence pa, mao nay improvident plea of guilty, kanang butang nga gisulta nga wala sa iyang kasingkasing kay taas gihapon ang pagkaestorya. Sa law, rules of procedure dili gyud siya admission of guilt,” sigon pa ni Cabrido sa interview sa DyRF.
Kini ang hinungdan nga ipasaka gyud nila ang kasong administratiba batok sa gobernadora ug mga opisyales sa Kapitolyo tungod kay hangtud karon nagpadayon gihapon kini sa pagdikidiki sa paghatag sa ilang gipangayong dokumento nga Memorandum of Agreement sa Korean Electric Power Corporation KEPCO ug sa lalawigan.
Kini may labot sa pagbayad sa maong kumpanya ngadto sa lalawigan sa mga coal ash waste sa ilang planta nga plano untang adto itambak sa Balili Property sa Tinaan Naga, ug ingon man ang Certificate of Land Title sa napalit nga lote ug ang deed of absolute sale.
Matud pa ni Cabrido nga dunay krimeng nabuhat ang Kapitolyo tungod kay may administrative liability na ang pagdumili sa paghatag sa ilang gikinahanglanong dokumento partikular na sa MOA nga makunsiderar nga usa ka public document.
Kini bisan pa man si Atty. Rory Jon Sepulveda nipahibawo pinaagi sa media nga andam na tanang mga dokumento nga gipangayo ni Cabrido ug mga kaubang environmental lawyer.
Matud pa ni Cabrido nga mao kini ang usa sa ilang mga target nga dili madayon ang coal ash power facility sa lungsod sa Naga ug insidente lamang ang kontrobersiya sa coal ash containment facilities ug sa lote sa Kapitolyo didto sa lungsod sa Naga.
Samtang gidepensahan ni Atty. Cabrido ang mga opisyales sa DENR nga mao karon ang gibasol sa Kapitolyo tungod sa giingong sayop nga titulo sa lote sa Balili property pinaagi sa pag-ingon nga maayo ang gihimo sa DENR ilabina sa land conversion. Apan gitataw niini nga inutil ang DENR sa kaso sa pagpatukod sa KEPCO sa lungsod sa Naga. (Chester Abadilla) (BANAT NEWS)