BJMP mosusi sa eskapo sa Lapulapu wa kabalik

CEBU, Philippines - Gisugdan na sa BJMP-Manila ang imbestigasyon sa pag-eskapo sa usa ka binilanggo sa Lapulapu City Jail samtang ang jail warden kasamtangang gihulipan kagahapon.

 Matud pa ni Sr. Insp. Mary Jane Enopia, PIO sa BJMP-7 miabot kagahapon ang mga imbestigador gikan sa ilang ulohang buhatan sa BJMP alang sa pag-imbestigar sa mga opisyal ug mga sakop sa BJMP Lapulapu gumikan sa pag-eskapo sa usa ka binilango niadtong milabay’ng Domingo sa buntag.

 Lakip sa giimbistigahan mao si Supt. Isabelo Cartin, jail warden sa Lapulapu City Jail hinungdan nga kini kasamtangang gihulipan sa iyang katungdanan kagahapong adlawa.

 Nagsilbing OIC jail warden sa Lapulapu City Jail mao si Chief Insp. Ma. Victoria Jimenez samtang nagpadayon ang imbestigasyon ni Cartin ug sa mga duty jail guards atol sa pag-eskapo sa maong binilanggo.

 Samtang si BJMP 7 Director Chief Supt. Doris Dorigo sa iyang bahin nagkanayon dili siya magpanuko sa pagrekomendar ngadto sa DILG sa pagpaghulip ug pagsilot sa responsable sa pag-eskapo sa maong binilanggo.

Kahinumduman nga usa ka Edgardo Teaño nga adunay kasong murder naka-eskapo sa Lapulapu City Jail niadtong milabay’ng Domingo petsa 9 ning bulana nga wala mamatikdi sa mga sakop sa BJMP nga nagbantay ug kahibulungan nga walay nakita sa CCTV camera kun asa miagi ang maong binilanggo atol sa pagpuga niini.

 Hangtod ning pagbalita pakyas ang mga sakop sa BJMP sa pagsikop og balik sa maong binilanggo. – BANAT NEWS