CEBU, Philippines - Patay diha-diha ang usa ka 34-anyos nga lalaki human kini pusila sa sakop sa Cebu City Police Office Police Auxiliary Group kanhi Barangay Intelligence Network (BIN) kagahapon sa buntag diha sa south coastal road property habig sa barangay San Roque, dakbayan sa Talisay.
Ang biktima giila sa mga polis nga si Gualberto Galleto, taga sitio San Rafael, barangay Tanke, dakbayan sa Talisay nga usa ka construction worker.
Si Galleto nakaangkon og samad pinusilan sa buko-buko ug dughan nga gituohang hinungdan sa iyang kamatayon.
Ang suspetsado mao si Armando Cabatuan, 33, taga barangay Alaska, Mambaling ug magbalantay sa outpost sa SRP kinsa mitahan dayon ngadto kang Supt. Jonathan Abella, hepe sa City Intelligence Branch (CIB) human sa nahisgutang hitabo.
Si Cabatuan dihang nahinabi sa mga tigbalita kagahapon mipasangil kang Galleto nga usa sa mga tulisan nga manulis diha sa mga magpundong motorista sa south coastal road property base usab sa mga reklamo.
Matud niini nga niadtong Sabado, si Galleto misulong sa outpost tungod kay nasuko niya sa iyang pagpamadlong ug giingong gibaharan siya niining birahan sa biktima.
Sa wala pa mahitabo ang insidente, ang biktima ug ang mga kauban niini nag-atang og sakyanan aron maka-hitch paingon ngadto sa ilang trabaho diha duol sa outpost ni Cabatuan.
Diha-diha iyaha kining gibadlong nga gidili ang pagpangatang og sakyanan sa maong lugar apan gibugal-bugalan hinuon siya niini hinungdan nga natandog ang iyang garbo ug napukaw ang ilang kanhi panagbangi hinungdan nga iyaha kining gipusil.
Si Galleto nakadagan human maigo sa buko-buko ug dihang natumba kini sa yuta ug nahayang giusban kini og pusil sa suspek sa dughan ug usban pa gyud unta niya kini pagpusil mikagar na sa ikatulong higayon ang armas.
Human og pagpamusil si Cabatuan ang mi-hitch og sakyanan paingon sa Cebu City Police Office ( CCPO) ug mitahan ngadto kang Abella lakip na ang .38 kalibreng rebolber nga may mga bala ug basiyo.
Si Abella mitawag mga alas 8:00 sa buntag kagahapon sa hepe sa Talisay City Police Station ug nagpahibawo kabahin sa pagtahan ni Cabatuan ug gi-turnover kang PO3 Eric Enad sa Talisay City Police Station.
Si Supt. Henry Biñas nagkanayon nga duna sila'y mga nadawat nga report batok sa biktima kabahin sa giingong kalambigitan niini sa mga pagpanulis diha sa maong dapit apan wala nila kini makumpirmar kun unsa ka tinuod.
Ang direktor sa CCPO nga si Sr. Supt. Patrocinio Comendador misuspenso sa membership ni Cabatuan isip sakop sa Cebu City Police Office Police Auxiliary Group human sa nahisgutang hitabo.
Matud ni Comendador nga wala sila’y giisyuhan og armas nga mga Police Auxiliary Group ug wala usab sila magtugot sa ilang mga volunteer nga magdala og pusil sa pag-abag sa kapolisan. (BANAT NEWS)