Inihaw'ng mga manok gipangsakmit

CEBU, Philippines - Nakasakmit na usab og inihaw'ng mga manok ug itik ang Operation Hot Meat sa Department of Veterinary Medicine and Fisheries (DVMF) sa Cebu City Hall.

Matud sa labaw sa DVMF, Doctor Alice Utlang nga 15 ka bisayang manok ug 3 ka itik ang gikompiskar sa Operation Hot Meat gikan sa Warwick Barracks kagahapong adlawa.

Kini tungod kay ang tag-iya niini nga usa ka Atan Ypil giingong wala makapakita og meat inspection certificate ngadto sa mga inspector.

Miingon ang labaw sa DVMF nga ang nasakmit nga mga manok ug itik gihatod gilayon ug gidonar ngadto sa Parian Drop-In Center.

Nagkanayon si Utlang nga makapila na nila pasidan-i ang mga dressed chicken dealer ug vendor nga adto lang magpa-ihaw sa accredited nga ihawan.

Niadtong miaging semana, ang Operation Hot Meat nakasakmit usab og siyam ka dressed chicken diha gihapon sa Warwick Barracks.

Matud ni Utlang nga ila unyang iduso ngadto kang City Market Administrator Racquel-Bohol Arce ang mga pangalan sa nasakmitan ug inihaw'ng mga manok aron mao nay mopahamtang og multa.

Subling gipadayag ni Utlang nga padayon nilang gi-monitor ang baligyang mga karne nga madagsa sa kamerkaduhan sa dakbayan alang sa kasiguruhan sa mga konsumidor nga limpyo ang mapalit nga karne ilabi na gikan sa mga satellite market sa siyudad. - Elly Bolonos (BANAT NEWS)