Gipuspusan sa pag-umangkon namatay

CEBU, Philippines - Patay diha-diha ang usa ka uyoan human gipuspusan og kahoy sa iyang kaugalingong pag-umangkon kagahapon sa ala 1:00 sa kaadlawon sa sitio Lower Looc barangay Calero lungsod sa Liloan. Ang namatay giila sa kapulisan nga si Rodulfo Judaya, 51, mangingisda samtang ang suspek mao ra ang iyang pag-umangkong si Joseph Judaya Barosa, 31.

Si PO2 Ruotchil Jugalbot sa Liloan Police Station nga gikahinabi sa Banat News nagkanayon nga si Judaya namatay gumikan sa grabeng kadaot sa iyang tangkugo ingon man ulo tungod sa pagbunal og dos por tres nga kahoy.

Matud pa ni Jugalbot base sa imbestigasyon nag-inom pa ang duha sa wala pa mahitabo ang krimen uban sa ilang mga paryente ug mga silingan.

Ang suspek pagkasayod nga miuli ang uyoan iyaha kining giapas ug gipukaw aron ipadayon ang ilang pag-inom hinungdan nga niuban ang biktima ug subling nag-inom apan dangtan pila ka gutlo nagkalalis ang duha sa wala matinong hinungdan ug misangko sa sinukmagay. Atol sa ilang panagbuno nakapunit og kahoy ang suspek  ug gipuspos ingon man giduslak-duslak kini ngadto sa biktima.

Wala pa matagbaw ang akusado mikuha na usab kini’g laing puspos dayong bunal sa tangkugo sa uyoan maong kini nahagba apan wala pa gyud matagbaw gikatahong giusban kini pagbunal diha sa ulo niini hinungdan nga namatay.

Human sa maong insedenti ang suspetsado ang daling nikagiw palayo sa nahisgutang lugar ug wala na maabti pa sa mga ni-respondeng kapulisan. – BANAT NEWS