Doktor nga 'naningha'g gitaktak sa CCMC

CEBU, Philippines - Hingpit nang gitangtang sa serbisyo ang usa ka doktor sa Cebu City Medical Center (CCMC) nga naninghag og tagtungod sa pasyente human wala pasayloa sa Employee-Management Committee On Investigation (Emcoi).

Ang wala pasayloa ug gitangtang sa trabaho mao si Doctor Fareeza Manjur nga giingong nakaalagad na sa CCMC sulod sa pipila ka tuig.

Matud pa sa labaw sa Employee-Management Committee On Investigation (Emcoi), Atty. Marie Velle Abella, nga napamatud-ang sad-an si Manjur sa reklamo nga gipasangil kaniya.

Kini mao ang gross misconduct ug conduct unbecoming of public official nga igo na nga magpatangtang sa trabaho sa maong empleyado.

Nasayran nga duha ka doktor ang gireklamo nga naninghag sa tagtungod dihang ang pasyente niini gidala diha sa nahisgutang tambalanan pipila ka buwan na ang nakalabay.

Apan si Doctor Genia Panganiban igo lang gi-reprimand tungod kay giingong wala mapamatud-i sa reklamante ang pasangil niini.

Gitataw ni Abella nga tataw ang nahimong kalapasan ni Doctor Manzur hinungdan nga kini maoy napahamtangan og mas bug-at nga silot.

“Naa man gud siya’y gipangsulti nga dili na unta angayang ipanulti nga mga pulong ba mao nga mas bug-at iyang penalty,” sumala ni Abella.

Nasayran hinuon nga si Mayor Tomas Osmeña maoy unang namahayag nga dili niya mapasaylo ang mga doktor nga mangasaba sa pasyente o sa tagtungod niini.

Gani makapila na nipasidaan ang mayor ngadto sa mga empleyado sa CCMC nga dili niini buhaton ang gihimo sa nahisgutang mga doktor.

Ang pagtangtang kang Manjur sa trabaho mao unya’y magsilbing mensahe sa mayor ngadto sa mga kawani sa maong tambalanan nga kini seryuso sa iyang pasidaan. – BANAT NEWS