2 ka batang gikan nag-rosaryo nadasmagan, 1 tipi

CEBU, Philippines - Usa ka 6-anyos nga batang babaye ang namatay ug laing 6-anyos nga kauban niini ang naangol human gidasmagan sa naghaguros nga van samtang ang duha naglakaw daplin sa karsada paingon nga mopauli gikan nitambong og dawn rosary sa barangay Lagundi sa lungsod sa Oslob niadtong Miyerkules sa alas 5:00 sa buntag.

Patay nang nahidangat sa Oslob District Hospital si MayFlor Mirasol, 6, molupyo sa nahisgutang lugar ug naangol sab ang kauban niining si Christine Charlote Soriano, 6.

Samtang ang drayber sa Isuzu ELF van type nga maoy nakadasmag sa mga biktima mao si Nestor Derero Patriarca, 28, taga Nasipit, Talamban dakbayan sa Sugbo malinawong mitahan sa kapolisan.

Subay sa spot report nga gipadangat sa kapulisan sa lungsod sa Oslob diha sa Cebu Police Provincial Office (CPPO) ang duha nagkuyog nga naglakaw daplin sa karsada paingon nga mamauli human sa ilang pagtambong og dawn rosary.

Apan pag-abot nila sa maong lugar kalit silang gidasmagan sa maong van nga nagpaingon sa Sugbo, ang van nga kusog kaayo ang pagdagan nalahos pa ngadto sa usa ka poste ug sa usa ka gi-parking nga multicab.

Ang duha ka mga bata ilabi na ang namatay nadaro diha sa ilawom nakaangkon og daghang kadaut sa kalawasan.

Gituohang nakatulog samtang nagmaneho ang drayber niadtong tungura hinungdan nga wala kini makabantay nga nitipas na ang sakyanan niini diha sa daplin ug napunggit ang mga bata.

Gisuwayan unta pagkontak sa Banat News ang Oslob Police alang sa dugang impormasyon apan magsige lang og bagting ang telepono niini ug wala gyu’y motubag ug ingon man dili sab makontak ang ilang hotline cell number. - Darrel Carumba (BANAT NEWS)