P98-milyones gibayad sa Balili beach gihimakak

CEBU, Philippines - Kusganong gihimakak  sa mga opisyales sa Kapitolyo ang pasangil sa negosyante nga si Crisologo Saavedra nga dili P98 milyones ang gibayad sa Kapitolyo ngadto sa pamilyang Balili isip bayad sa 25 ka hektaryang lote niini didto sa barangay Tinaan, lungsod sa Naga.

Sumala ni Capitol consultant for Information Rory Sepulveda nga usa ka dakong bakak ang gipahayag ni Amparo Balili , asawa ni Engr. Luis Balili nga matud pa P65 milyones ray gibayad sa Kapitolyo sa ilang yuta nga gilangkoban sa balig 10 ka parcela.

 Sigun sa report sa DyRF, gipamatud-an ni Sepulveda nga P98 milyones gyuy gibayran sa Kapitolyo ngadto sa pamilyang Balili pinaagi sa mga dokumento niining gipakita sa DyRF nga anaay pirma ni Romeo Balili kinsa maoy nagpresentar sa pamilyang Balili sa pagdawat sa P98 milyones.

 Gipakita usab ni Sepulveda ang mga titulo sa napulo ka lote nga napalit sa kagamhanan sa probinsiya agi og tubag sa hagit sa nagkwestyon sa maong transaksyon.

 Giklaro usab ni Sepulveda nga ang maong mga titulo wala malakip sa gitumbok sa environmental lawyer nga si Benjamin Cabrido Jr. nga na-converted balik sa kagamhanan tungod kay kini anaa na sa hunasan.

 Apan gitataw hinuon ni Sepulveda nga andam silang mopasaka og kaso batok sa mga pamilyang Balili lakip na ang mga opisyales sa DENR nga miluwat sa maong mga titulo sa higayon nga mamatud-an nga 40 porsiyento niini hunasan.

 Sa samang higayon, gipaabot karon sa buhatan ni Gobernador Gwendolyn Garcia ang survey nga gipahigayon sa Provincial Environment and Natural Resources (PENRO) nga mahuman karong sunod semana.

Sayo niini, napanglantawan ni Mayor Tomas Osmeña ang dakong kalagmitan nga mokagulkol sa prisohan ang mga sakop sa appraisal committee sa Kapitolyo kun mamatud-ang ang gibayrang yuta sa kagamhanan sa lalawigan nga naa sa ilawom sa dagat.  – BANAT NEWS