CEBU, Philippines - Nasikop sa kapolisan ang usa ka babaye nga suspetsado sa pagpamaligya og shabu didto sa Sitio Sta. Cruz ,Brgy. Guizo dakbayan sa Mandaue sa milabay’ng gabii.
Ang nasikop mao si Geraldine Giuo-giuo, 25, dalaga, apan may ka-live-in sa Sta. Cruz.
Ang misikop kang Giuo-giuo mao ang mga sakop sa City Anti Illegal Drug Special Operation Task Force (CAIDSOTF) sa Mandaue City Police Office (MCPO).
Kini human nakonpirmar sa mga otoridad nga namaligya og shabu sa ilang lugar ang maong suspetsado.
Matud pa ni SPO4 Ariston Bataluna sa CAIDSOTF nga bag-o lang nalambigit si Giuo-giuo sa maong negosyo ug dihang ila kining nasayran gipahigayon dayon nila ang buy bust operation.
Nasakmit sa mga otoridad gikan sa suspetsado ang 11 ka gagmay’ng pakete sa gituohang shabu, P250 nga marked money ug mga kagamitan sa pagpamutos sa maong illegal nga drugas.
Nagpahayahay na karon sa prisohan ang maong suspetsado samtang gipasaka na batok kaniya ang kaso sa paglapas sa Akta Republika 9165. (Bong Soriano) (BANAT NEWS)