US Citizen sikop sa drug raid

CEBU, Philippines - Usa ka US citizen nga level one pusher natagak sa mga kamot sa Philippine Drug Enforcement Agency (PDEA-7) human sa gipahigayong pagpang-ronda kagahapon sa alas 4 sa kaadlawon diha sa panimalay niini sa Sitio Banawa, barangay Guadalupe ning dakbayan sa Sugbo.

Si Lowie Mandado, 29, ulitawo, taga Hawaii gidakop pinasikad sa search warrant nga gi-isyu ni Executive Judge Miendrado Paredes sa Regional Trial Court (RTC-7).

Ang tigpamaba sa PDEA-7 Jessie Tabanao nga gikahinabi sa mga tigbalita mibutyag nga ilang nakuhaan og usa ka dakong putos sa gituohang shabu nga gisumiter sa PNP Crime Laboratory 7 alang sa pagsuta kun pila ang kinatibuk-ang timbang niini.

Matud pa ni Tabanao nga usa ka bulan nilang gipanid-an si Mandado ug sa dihang ilang nakonpirmar nga dunay gitiner nga mga ilegal nga drugas, nangayo siya og search warrant sa korte.

Gikataho nga   makabaligya si Mandado og shabu nga kapin sa usa ka kilo matag bulan bisan pa man kun didto siya sa gawas sa nasud pinaagi sa pagpadala sa iyang sinaligan nga ginganlan og "Bukog".

Gibutyag niini nga niadto pang milabay'ng bulan naabot dinhi sa Sugbo si Mandado ug gikatakdang mobalik kini didto sa Hawaii karong Septiyembre apan ang report nga nalambigit kini sa ilegal nga drugas niadto pang milabay'ng tuig ilang nadawat hinungdan nga milampos sila sa pagsikop niini kagahapon.

Ang mga ilegal nga drugas nga ginegosyo ni Mandado gikatahong gikan kini sa Mindanao diin duna kini daghang kontak sa nahisgutang lugar ug dinhi sa dakbayan ug ubang dapit sa Sugbo ang ilang merkado.

Dugang pa ni Tabanao nga ang panimalay nga gipuy-an ni Mandado gipanag-iya kini sa gikatahong drug pusher dinhi sa dakbayan sa Sugbo nga nailang si Tata Negro. Hinuon ang akusdo mibutyag nga napalit ang panimalay sa iyang iyaan.

Gikonpirmar usab ni Tabanao nga si Mandado silingan kini diha sa may B. Rodriguez, barangay Sambag II ning dakbayan.

Gihikay na hinuon sa PDEA-7 ang tukmang kaso nga ipasaka batok sa maong akusado.

Ang Banat News dunay nakuhang impormasyon gikan sa usa ka kasaligang tinubdan nga gikatahong si Mandado maoy amo ni Tata Negro sa mga negosyo sa ilegal nga drugas.

Gikatahong sila si Mandado ug Tata Negro magpa-ilog pa kini og kwarta sa mga estambay ug mga residente diha sa ilang lugar sa panahon nga daugan kini sa ilang pagpanugal og manok. – BANAT NEWS