TF Colon gilusad pagmenos sa krimen

CEBU, Philippines - Task Force Colon gilunsad sa kapulisan sa dakbayan sa Sugbu kagahapong adlawa nga maoy tahasan pagbantay sa bisan unsang krimen batok sa mga dautang elemento diha sa dalan Colon.

Ang maong kalihukan gipanguluhan mismo ni Sr. Supt. Patrocinio Comendador, director sa kapulisan sa dakbayan sa Sugbu, mga opisyal sa Cebu City Police Office ug barangay Kapitan Pancho Ramirez ug mga opisyal niini sa barangay Sto. Niño.

Si Comendador nga gikahinabi sa mga tigbalita nagkanayon nga ilang nabantayan nga epektibo ang pagbutang sa Task Force Colon kini tungod kay sukad sa ilang pagbutang niini niadtong Lunes upat na ka mga snatchers ang ilang nadakpan.

Giklaro niini nga ang maong Task Force niadto pa kini nila ma-conceptualized apan karon lang gyud napatuman, gani kagahapon ceremonial nalang kini tungod kay niadto pang Lunes kini nagsugod.

Ang task force gidumala ni Sr. Insp. David Señor nga chief sa Operation Branch sa CCPO ug nasakop sa maong grupo ang kinatibuk-an sa Colon hangtud na sa dalan V. Gullas ug Pelaez St.

Samtang si Supt. Paul Labra ll ang deputy city director for operation sa CCPO nagkanayon nga dunay 70 ka mga police nga mag-duty 24 oras diha sa dalan Colon inabagan sa mga barangay tanod ug Barangay Intelligence Network (BIN).

Matud pa ni Labra gitinguha nilang maminosan ang petty crimes sa maong dapit. - Guam Logroño