Bahad sa DOH-7 vs CCMC gihangop pag-ayo ni Tom

CEBU, Philippines - Gihangop ni Mayor Tomas Osmeña ang bahad sa Department of Health (DOH-7) pagtangtang og lisensya ug pagpasira sa Cebu City Medical Center (CCMC) kun kini mobalibad og pasyente gikan sa kalungsoran.

Matud ni Osmeña nga iyang gikalipay ang maong lakang sa DOH-7 aron dili na usab siya magproblema sa maong tambalanan.

Gani nangiliyupo pa si Osmeña ngadto sa nahisgutang ahensya nga dalion ang pagpasira sa kontrobersyal nga ospital.

Ang mayor nakapakpak sa kalipay human masayod sa plano sa DOH-7 ug miawhag sa maong ahensya nga kuhaon na niini ang mga kawani sa CCMC.

“Yes! Please, hay salamat! As long as I can turn-over all these employees to DOH, ay sus, please…” nagkanayon si Osmeña.

Una nang gimando sa mayor ngadto sa nagdumala sa CCMC nga dili na dawaton niini ang mga pasyente nga molupyo sa probinsya.

Gusto ni Osmeña nga ang maong mga pasyente dalhon ngadto sa buhatan ni Gobernador Gwendolyn Garcia aron kini na maoy moatiman kanila.

Butang nga wala mauyoni ni DOH-7 Director Dr. Susana Madarietta tungod kay ang maong lakang giingong usa ka kalapasan sa balaod.

Gipadayag na hinuon sa mayor nga dili balibaran sa maong tambalanan ang mga pasyente gikan sa lalawigan nga nagkinahanglan og dinaliang pag-atiman.

Sa susamang kalambuan, padayong gisaway ni Osmeña ang mga nagdumala sa CCMC ilabi na ang direktor niini nga si Dr. Myrna Go.

Nagtuo ang mayor nga walay laing tambalanan nga mokuha sa serbisyo ni Go ug sa ubang kawani sa CCMC hinungdan nga kini mipilit sa maong ospital.

“Many of these people in the hospital including Dr. Go are there because they can’t find job outside, if you’re insulted you just leave and find another job somewhere else but who will hire them,” sumala ni Osmeña.

Gipahibalo sa mayor nga iya nang gikanselar ang Christmas party sa mga kawani sa CCMC karong Disyembre tungod sa iyang kadismaya sa pangalagad niini. - Elly Bolonos (BANAT NEWS)