CEBU, Philippines - Mga tinun-an sa pipila ka mga pribado ug pampublikong tunghaan sa high school lungsod sa Malabuyoc, Daanbantayan ug Bogo gikatahong gipanghilantan sumala pa sa Department of Health-7 ug gikabalak-ang nataptan og Influenza A (H1N1) virus.
Ang Regional Epidemiology Surveillance Unit-7 uban sa Provincial Health Office nanguha og mga swab samples sa mga tunghaan kagahapon sumala pang Dra. Cora Lou Kintanar ang tigpamaba sa mga kaso may labot sa maong virus dihang nahinabi sa Banat News.
“Around 40 plus (estudyante) kuno, but we can’t give complete details until tomorrow (karong adlawa),” asoy pang Kintanar.
Kagahapon ang lungsod sa Bogo ug Daanbantayan giduaw na sa medical teams, dunay ipahigayong random swab testing sa mga tinun-an partikular na ang pito ka tunghaang dunay mga kaso sa mga hilanat nga na-report diha sa Rural Health Unit sa munisipyo sa Bogo.
Matud pa ni Kintanar nakadawat sila og report gikan sa mga RHUs sa maong mga lungsod kabahin sa di kasagarang gidaghanon sa mga tinun-ang gipanghilantan sa maong mga lugar.
Samtang sa Malabuyoc, gipapangita una ni Kintanar og medical technologists ang municipal health officer aron maoy mokuha og swab test samtang wala pa makaabot diha sa ila ang medical teams.
Ang Banat News nga gikahinabi sa Municipal Health Officer sa Malabuyoc nga si Dr. Minerva Melior mibutyag nga dunay napulo ka mga tinun-ang nagpakonsulta sa ilang klinika niadtong milabay'ng adlaw tungod sa hilanat.
Sagad kanila manag-classmate ra ug pulos mga first year sa high school sa usa ka pribadong tunghaan sa ilang lungsod apan migawas sa iyang paghiling nga common flu nga gidunganan og tonsillitis ang ilang gipamati sa ilang lawas.
“Duna man nagpakonsulta diri pero dili man alarming kay sa akong pagtan-aw common flu ra man ug viral infections,” asoy pang Melior.
Ang mga tinun-an gihatagan na og paracetamol, vitamin C ug giresitahan og antibiotics alang sa hingpit nilang pagkaalim.
Samtang pakyas ang Banat News pagkuha og dugang impormasyon sa mga municipal health officers sa lungsod sa Daanbantayan ug sa Bogo.
Apan si Daanbantayan Mayor Sun Shimura nga gikahinabi sa Banat News sa telepono mibutyag nga onse ka mga tinun-an ang gikuhaan og swab test sa Provincial Health Office ug RESU-7 kagahapon ug magpadayon kini karong adlawa apan gihulagway niyang ‘under control’ na kini.
Wala hinuon momando si Shimura nga kanselahon ang klase sa mga tunghaang dunay nangasakit kundili mipagawas kini og memorandom o direktiba nga papaulion nalang sa mga head teachers ug principal ang mga estudyanteng hilantan ug papahuwayon.
Sumala pa niya nga kun dunay motumaw nga positibo sa gikuhaan og swab test kagahapon naglaraw ang mayor nga mamalit og “tamiflu” nga medisina gikan sa ilang calamity fund ug ipa-disinfect ang mga classroom nga diin magtungha ang nangasakit.
Subay sa record sa DOH-7 moabot na og 23 ka mga tunghaan dinhi sa Central Visayas ang natakboyan sa maong virus ug kadaghanan naa dinhi sa Metro Cebu.
Giklaro usab ni Kintanar nga dili na kini usa ka seasonal flu kundili A(H1N1) virus na gyud ang mitakboy karun dinhi sa Central Visayas tungod sa kapaspas pagtakod niini itandi sa ordinaryo lang nga hilanat.
Apan gipadayag ni Kintanar nga walay angay kabalak-an tungod kay kompleto sila sa mga tambal niini ug bugtong buhaton mao nga kanunay lang mag-amping aron malikay sa maong sakit. – BANAT NEWS