Gikahadlukang nasudlan sa A(H1n1) kapin 100 ka priso gipanghilantan

CEBU, Philippines – Naalarma ang mga kadagkoan sa Mandaue City Jail human kapin sa usa ka gatus ka mga bilanggo ang gikatahong gipanghilantan sulod sa pipila na ka mga adlaw.

Si Jail Warden Supt. Simeon Dolojo Jr. mibutyag nga miabot na og kapin usa ka gatus ang gipanghilantan sa maong bilanggoan maong nangayo na siya og tabang sa mga doktor sa ilang buhatan sa Burea of Jail Management and Penology ingon man Department of Health (DOH-7).

Gumikan kay nabalaka siyang basin og nasudlan na ang maong bilanggoan sa gikahadlukang Influenza A(H1N1) virus.

Sa pagkakaron, gimando na ni Dolojo ang paglain sa mga bilanggong dunay sintomas sa flu ilabi na niadtong gipanghilantan samtang gipaabot pa ang resulta sa ilang eksaminasyon.

Si JO1 Christopher Abrasaldo sa nahisgutang bilanggoan nga nahinabi sa Banat News miingon nga ang pipila sa gipangtakboyan og hilanat nga binilanggo naulian na human makatumar og tambal nga gihatag gikan sa ilang doktor sa BJMP.

Matud pa niya nga gumikan sa kadaghan sa gipanghilantan sa milabay’ng mga adlaw nagkuwang gyud ang ilang tambal maong nangayo na sila og ayuda sa ilang rehiyonal nga buhatan.

“Nagkuwang mi sa tambal. Daghan man gud ang gitakboyan mao nga gipaabot pa namo ang mga doktor sa DOH nga magdala sad og tambal,” sumala pa ni Abrasaldo.

Si Dr. Cora Lou Kintanar nga maoy tigpamaba sa DOH-7 nga nahinabi sa Banat News mipadayag nga iyahang ipasusi kang Regional Epidemiologist Officer Reynan Cimafranca ang nahisgutang bilanggoan.

Kini aron makuhaan og swab samples ang mga bilanggo ug ipailawom sa laboratory test aron pagtino kun seasonal flu lang ba kini o ba kaha ang gikahadlukang A(H1N1) virus na.

Ang resulta unya sa makuhang swab sample gikan sa mga bilanggo paabuton pa og tulo ka adlaw una pa mogawas.

“Pero, bisan kun wala pa ang resulta ug kun makita namong grabe na ato nalang gyung patambalan,” sumala pang Kintanar.

Kahinumdoman nga naoktaba ang pagbukas sa klase sa University of Cebu Mandaue ug Lapulapu niadtong miaging bulan tungod usab sa mga tinun-an nga gikatahong gitakboyan og A(H1N1) virus.

Ang maong tulunghaan nahimutang sa sitio Pokang sa barangay Looc ug ang Mandaue City Jail nahimutang usab sa dalan Superior sa nahisgutan gihapong barangay sa maong dakbayan. – BANAT NEWS