CEBU, Philippines - Mokabat sa 2,000 ka mga cellphone ang giapod-apod ni Kongresista Benhur Salimbangon sa ika-upat nga distrito ngadto sa mga opisyal sa kalungsoran ug kabarangayan sa maong distrito.
Kini human niya ikasabot ang tagdumala sa Sun cellular sa presyo nga tag P1,500 ra ang matag unit.
Si Salimbangon mibutyag nga ang bugtong tuyo niya niini mao ang permaninteng komunikasyon tali kaniya ug sa tanang mga opisyal sa kalungsoran ug kabarangayan sa iyang distrito.
Gusto niyang matag karon ug unya madawat niya ang mga pahibawo gikan sa iyang mga konstituwente bahin sa panginahanglan ug suliran nila nga nagkinahanglan og tabang gikan kaniya.
Matud pa ni Salimbangon nga dili kini pamolitika kundili mao kini ang labing epektibo nga paagi kun ang usa ka tawo tinuod nga moserbisyo sa mga molupyo nga iyang gialagaran.
Mahisama siya sa usa ka amahan sa panimalay nga kanunay nga mahingawa sa kahimtang sa iyang pamilya sulod sa balay ilabi na kun magkalay-anay sila.
Mangita gyud og paagi aron nga kutob sa mahimo makalihok dayon siya kun dunay motumaw nga problema sa iyang distrito ug dili kay magmika lang.
Gani ang bayranan nga balig P3 milyones ning tanang unit nga iyang ipanghatag sa mga opisyal sa kalungsoran ug kabarangayan maggikan sa iyang countrywide development fund. – BANAT NEWS