CEBU, Philippines - Duha ka mga barangay sa dakbayan sa Sugbu ang duawon sa Cebu City Comelec Office karong adlawa alang sa pagpadayon sa satellite registration niini. Ang barangay Sambag 1 maoy pahigayunan sa off-site registration sa Comelec North District samtang ang Comelec South District anha usab sa barangay Basak San Nicolas. Matud ni City Election Officer Marchel Sarno nga ang ilang tumong mao ang pagpaduol sa mga applicants sa kabarangayan.
“Ang ato ani to bring Comelec closer to the applicants for registration aron dili gyud sila makasulti nganong dili makarehistro ug dili makabutar sa 2010 elections,” sumala ni Sarno.
Gawas sa kabarangayan, ang Comelec gitakda usab nga mopahigayon og laing satellite registration sa pipila ka dagkong mga unibersidad sa siyudad.
Karong Hulyo 22 duawon sa Comelec ang University of San Carlos-Talamban Campus, samtang sa Hulyo 23 ang Cebu Normal University na usab.
Unya sa Hulyo 30 mopahigayon usab og satellite registration ang Comelec sa Southwestern University, ug sa Hulyo 31 sa University of San Jose-Recoletos Basak Campus. Gipasabot ni Sarno nga dili lang ang mga tinun-an maoy makaparehistro diha sa mga tunghaan hasta usab ang mga molupyo sa kasikbit nga mga barangay niini.
Lakip sa gidasig sa election officer nga magparehistro mao kadtong mga batan-on nga mag-edad og 18 anyos atol sa eleksyon sa buwan sa Mayo sunod tuig. Identification (ID) card lang ang gikinahanglang dalhon niadtong gusto nga mopahimulos sa off-site registration o dili ba hinuon ang ilang birth certificate.
Una nang napahigayonan sa Comelec sa siyudad og satellite registration ang mga barangay sa Tagbao, Pit-os, Talamban, Guba, San Jose, Tejero ug uban pa. - Elly Bolonos (BANAT NEWS)