CEBU, Philippines - Posibleng may dakong problema ang kagamhanan sa lalawigan sa Sugbu sa napalit nga 25 ka mga hektaryang luna sa Balili Beach sa lungsod sa Sugbu sa kantidad nga 100 milyon ka pesos.
Sumala pa ni Atty. Benjamin Cabrido Jr. uban ni Atty. Gloria Estenso Ramos, mga environmental lawyers nga may nakuha silang impormasyong ang lote nga gibaligya ni Engr. Balili ngadto sa Kapitolyo, nalakip sa luna nga na-convert ngadto balik sa gobiyerno base sa final and executory nga desisyon sa Korte Suprema niadtong tuig 2003.
Si Atty. Cabrido nagkanayon nga ila na karong gi-counter check ngadto sa Office of the Solicitor General ang maong dokumento sa lote samtang ilang gipaabot ang gisaad ni Atty. Rory Jon Sepulveda, usa sa mga consultants sa Kapitolyo nga maghatag og kopya sa deed of sale sa pagpalit nila sa maong luna.
Ang maong luna gikatahong giplanohan ni Gov. Gwendolyn Garcia nga tukoran og international port ug labayanan sa mga abo sa planta sa Korean Power Corp.
Sumala pang Cabrido gisusi nila karon kung may katungod ba si Balili pagbaligya sa maong luna nga gipanag-iya sa gobiyerno.
Sigun pa ni Cabrido nga mahimong walay bili ang gihuptang nga titulo sa yuta ni Balili ug Kapitolyo kun nakuha ang maong titulo sa yuta pinaagi sa “fraud ug misrepresentation."
Samtang nagdumili si Cabrido sa pagtubay sa mga pagsaway sa Kapitolyo nga nagkwestiyon sa ilang awtoridad nga mosulting makadaot ang coal ash nga itambak sa Kapitolyo gikan sa Korean Electric Power Corp. kon KEPCO ngadto sa maong luna.
Apan iyang gitataw nga may scientific evidence silang nakuha nga nagtumbok nga ang bisan unsang matang sa coal ash may sagol kining cadmium, lead ug mercury- mga matang sa chemical nga gitawag og Persistent Organic Pollutant nga makadaut sa kalikupan ug sa katawhan. – BANAT NEWS