CEBU, Philippines – Patay ang usa ka 75-anyos nga lola human kini madasmagi sa naghaguros nga motorsiklo atol sa iyang paglabang sa karsada sa barangay Dumlog siyudad sa Toledo niadtong Domingo sa ala 1:15 sa hapon.
Ang biktima patay na pag-abot sa Toledo City District Hospital ug giilang si Anastacia Roma, 75, taga barangay Canlumampao sa maong siyudad, samtang giila ang drayber nga nakadasmag kaniya mao si Carlito Candol, 20, taga sitio Ylaya barangay Talavera sa siyudad sa Toledo.
Matud pa ni SPO1 Lorenzo Mahilum, traffic investigator sa Toledo City Police dihang nahinabi sa Banat News ang biktima naglakaw daplin sa karsada samtang ang motorsiklo kusog nga nagpadagan gikan sa barangay Talavera paingon sa Poblacion.
Subay sa inisyal nga imbestigasyon kalit lang nilabang sa karsada ang biktima pag-abot sa nahisgutang lugar ug naatol nga maoy pag-agi sa maong motorsiklo ug nadasmagan gyud kini og sa iyang pagkatumba nabunal ang ulo.
Ang drayber boluntaryong mitahan sa iyang kaugalingon sa kapolisan ug nagtingkagol na karon sa detention cell samtang nagpaabot sa tukmang sumbong nga ipasaka batok kaniya. – BANAT NEWS