Karaang NPC nasunog

CEBU, Philippines – Miulbo ang usa ka sunog sa National Power Corporation (NPC) alas 3:05 kagahapon sa hapon sa barangay Talavera dakbayan sa Toledo nga miabot sa 3rd alarm. Si Sr. Insp. Randy Mendaros ang Fire Marshall sa dakbayan sa Toledo nga gikahinabi sa Banat News miingon nga nasunog ang underground sa maong planta nga gibutangan sa mga basura ug krudo niini.

Ang kalayo nakontrolar sulod lang sa 15-20 minutos gikan nadawat ang maong alarma. Ang mga bombero mipasirit og daghang tubig sa underground gumikan sa krudo sa ilawom.

Wala hinuon maapektahi ang suplay sa kuryente sa maong dapit apan gibantayan sa kabomberuhan ang lugar atol sa pagsulat ning balita gumikan kay gikabalak-ang moulbo ang pipe line sa ilawom nga giingong dunay gipundong krudo.

Ang upat ka andanang karaang edipisyo nga gisugdan na sa pag-demolish ang gilamoy sa kalayo. Upat ka mga fire trucks sa Toledo ang ni-responde, usa sa Aloguinsan, Pinamungajan, Balamban, Asturias maoy nagtinabangay sa pagpawong sa kayo nga nakapaukay sa mga residente sa nahisgutang lugar. – Guam Logroño (BANAT NEWS)