CEBU, Philippines - Gipanawagan ni Kongresista Antonio Cuenco sa South District sa dakbayan sa Sugbo si Kapitan Eugenio “Jing-Jing Faelnar sa barangay Guadalupe nga itugyan na lang ang paghukom ngadto sa mga lumolupyo pinaagi sa plebisito pagbuwag sa Banawa-Englis ug Guadalupe aron mahimong duha ka barangay.
Si Cuenco sa pakighinabi sa Banat News kagahapon nagkanayon nga naaprubahan na ngadto sa House of Representatives ang gipasar niyang bill sa pagbuwag sa maong mga lugar apan nalangan sa Senado tungod kay naghuwat pa sa pagsanong ni Faelnar.
Giawhag ni Cuenco si Faelnar lakip na si Bise Mayor Michael Rama nga mopadangat og suwat ngadto sa Senado nga wala sila’y pagsupak sa nahisgutang bill aron mahatagan na og katumanan ang yangongo sa mga molupyo diha sa barangay Guadalupe.
Gibutyag ni Cuenco nga sobra sa 6,000 ka mga residente sa barangay Guadalupe sagad taga Banawa ug Englis kay giingong wala makontento sa serbisyo sa mga opisyal sa barangay nga mipadangat ngadto kaniya og suwat nga buot nilang ibuwag ang Banawa-Englis sa Guadalupe.
Gikatahong tungod sa kalapad sa barangay Guadalupe wala na makatagamtam ang molupyo sa Banawa ug Englis sa serbisyo gikan sa mga opisyales sa barangay.
Ang Kongresista nagkanayon nga dugay na niyang nahatag kang Faelnar ang mapa sa maong mga lugar aron makita ang boundary niini lakip na ang suwat nga iyang gipadala niadtong milabay’ng buwan apan giingong hangtud karon gitun-an pa gihapon kini sa kapitan.
Ang barangay Guadalupe dunay sobra sa 40,000 ka mga molupyo 23,000 ang naa sa Banawa-Englis ug 24,000 ang sa Guadalupe. - Brenda Batuto (BANAT NEWS)