Nasangit sa sanga natagak naligsan

CEBU, Philippines – Nagkatag sa karsada ang utok sa usa ka 20-anyos nga truckboy human aksidenting natagak dihang nasabod sa sanga sa kahoy ug naligsan diha sa Sitio Baha baha, barangay Liboron Carcar niadtong Biyernes sa mga alas 11:00 sa gabii.

Apan ang naka-problema kay wala mo-report sa kapulisan sa maong panghitabo ang drayber sa maong cargo truck ug tag-iya niining mga molupyo ra usab sa maong lugar.

Bugtong ang nagtuasik nga utok sa tawo maoy nakahatag og giya sa mga residente nga dunay nahitabong aksidene sa milabay’ng gabii hinungdan nga nagpakisusi ug misumbong sa kapolisan.

Matud pa ni PO1 Gelmir Noval sa Carcar Police dihang nahinabi sa Banat News atol sa pakisusi sa iyang mga kaubanan nasuta nga ang nagkatag nga sulod sa ulo sa tawo iya diay ni Michael Lastimosa, 20, nga taga barangay Uling sa Naga.

Si Lastimosa truck boy sa usa ka negosyante og noodles nga si Felix Cabusas ug mao usab ang tag-iya sa maong truck nga nagbase sa sitio Magsipit barangay Liboron sa Carcar.

Samtang ang drayber sa maong cargo truck mao si Reggie Labajo, taga barangay Lagtang siyudad sa Talisay.

Sa imbestigasyon sa kapulisan nasuta nga dunay kargang mga kahoy ang maong truck nga pang-sugnod sa mga lutuong noodles paingon sa Liboron.

Gikatahong nagpatong ang biktima sa mga kargang kahoy kauban ang laing truckboy nga si Mark Anthony samtang ang drayber ug ang tag-iya maoy diha sa front seat.

Matud pa sa kapolisan pag-agi sa maong lugar wala makabantay ang biktima sa sanga sa kahoy nga kamanse ug nasabod kini hinungdan nga natagak ug pagtugpa niya sa sementadong karsada napasok kini sa ilawom ug nalatayan ang ulo sa duha ka ligid sa atras sa mao gihapong cargo truck.

Dugang nahipos nga impormasyon sa kapulisan nga inay mo-report sa kapulisan sa maong panghitabo human madala ang biktima sa Vicente Sotto Memorial Medical Center diin kini gideklarar nga dead on arrival nga wala ipahibalo sa tag-iya ug drayber sa kapolisan ang nahitabo.

Ang kapulisan padayun pa sa ilang imbestigasyon pagkumpleto sa impormasyon alang sa pagpasaka og kaso sa drayber ug sa tag-iya, atol sa paghimo ning balita wala pa mopatim-aw sa buhatan sa kapulisan ang tag-iya ug ang drayber. – BANAT NEWS