Pag-umangkon sa "druglord" gibati og kabalaka

CEBU, Philippines – Biktima sa pagpanagit ang gibati og kabalaka sa iyang kinabuhi ug walay planong mopauli ngadto sa ilang balay tungod kay matud niya nakasiguro siyang luwas kung anha lang siya magpuyo sa Talisay City Police Station.

Si Joel Rhey Basay kinsa biktima sa pagpanagit ug gi-torture sa kaugalingon niining uyoan nga si Marino “Inok” Lawis nga giingong usa ka druglord ug sa duha ka kauban niining si Manuel Samson ug sa giilang “Tawiwa” ang mibutyag kagahapon sa Banat News nga gibati siya og kabalaka sa iyang kinabuhi tungod kay posibleng napungot na karon ngadto niya ang mga suspetsado ilabi na sa iyang pagbutyag ngadto sa mga polis sa iyang nahibaw-an sa ilegal nga kalihukan sa iyang uyoan nga mao ang pagpamaligya og ginadiling drugas nga gani gihimo usab siyang “runner” niini.

Matud ni Basay nga wala siya’y planong mopauli ngadto sa ilang balay tungod kay alang niya nakasiguro siyang luwas ang iyang kinabuhi kung anha una siya mopuyo sa Talisay City Police Station.

Si Basay midugang nga mag-agad lang siya sa kapolisan kung unsay angayang buhaton sa iyang sitwasyon karon ug gani andam siya kung ipaubos siya sa witness protection program.

Si Senior Inspector Isagani Abalo, Deputy sa Talisay City Police Station sa pakighinabi niini sa Banat News kagahapon nagkanayon nga tumanon nila ang mando ni Provincial Police Director, Senior Superintendent Jesus Gacquing sa pagpalawom sa imbestigasyon sa maong hitabo.

Matud niini nga nagsusi na sila karon kabahin sa background ni Lawis kung usa ba kini sa dagkong drug personality dinhi sa rehiyon.

Niadtong Martes sa buntag napasaka na ngadto sa piskaliya sa siyudad ang kasong serious illegal detention ug paghupot og mga drug paraphernalia batok sa mga suspek.

Si Abalo nagkanayon nga gibantayan nila ang siguridad ni Basay aron dili kini mahimutang sa peligro apan kung mopauli kini ngadto sa ilang balay dili usab sila kapugong tungod kay katungod man usab niya kini. – Brenda D. Batuto (BANAT NEWS)