'Druglord' gikiha na

CEBU, Philippines – Giduso na sa kapolisan sa dakbayan sa Talisay kagahapon sa buntag ngadto sa piskaliya sa siyudad ang kasong serious illegal detention ug paghupot og drug paraphernalia batok sa giingong drug lord ug sa duha ka kauban niini.

Kahinumduman nga si Joel Rhey Basay ang mipasangil sa iyang uyoan nga si Marino “Inok” Lawis nga gitug-an niyang drug lord uban nila ni Manuel Samson ug sa giilang “Tawiwa” midagit ug mi-torture kaniya.

Si Insp. Paul Vincent Dorado kinsa maoy nangulo sa pagluwas kang Basay mibutyag sa Banat News nga kagahapon nasang-at na ang kaso diha sa Talisay City Prosecutors Office.

Kahinumduman nga si Lawis kinsa uban nila ni Tawiwa ug Samson ang giingong mipasakay kang Basay ngadto sa awto ug midala kaniya sa Sea View Heights, barangay Lawaan I ug didto gigaid susama sa baboy ug gibunal-bunalan og baseball bat, gituohang nasuko ang suspek sa biktima ug gituohang gitambling niini ang nakolektang halin sa drugas.

Si Sr. Supt. Jesus Gaquing Sr. sa Cebu Provincial Police Office mimando ni Supt. Henry Biñas nga palawman ang imbestigasyon ilabi na sa alegasyong may kalambigitan sa illegal drugs ang pagdagit sa biktima.

Si Gacquing nakigkita kang Basay kagahapon ug mipasalig sa seguridad niini, si Basay mahimong anha nalang una mopuyo sa Talisay Police Station samtang gipangita pa ang mga suspek gumikan sa kapeligro sa kinabuhi niini karon.

Samtang gisusi usab sa kapolisan ang record sa watchlist sa mga drug personalities sa lalawigan kung si Basay mao ba ang nabaniog nga drug runner nga “JR” lakip na si Lawis. – Brenda Batuto ug Rey Pasaporte (BANAT NEWS)