Nagselos ang sikyu, Barangay Intelligence Network nga karibal gipusil, patay

CEBU, Philippines – Patay nang miabot sa tambalanan ang usa ka dispatcher sa PUJ nga giingong sakop sa Barangay Intelligence Network sa dakbayan sa Lapulapu human kini pusila sa iyang karibal nga usa ka security guard sa barangay Buaya dakbayan sa Lapulapu sa milabay'ng gabii.

Ang biktima mao si Rodrigo Baguio ug residente sa maong dapit, samtang ang suspetsado nailang si Rowel Bislig Maglangit, 32,residente sa Poblacion dakbayan sa Lapulapu ug lumad sa Tambo Pafre Burgos, Southern Leyte nga usa ka security guard sa Ever Trust Security Agency nga nadistino sa Pusok Elementary School sa maong dakbayan.

Base sa imbestigasyon ni SPO2 Rolito Jumao-as pangabubho ang gituohang motibo ni Maglangit pagpatay sa biktima gumikan kay giingong mao nay karelasyon sa biktima ang kanhi kapuyo sa suspek ug di kini makadawat nga gibiyaan siya sa maong babaye.

Si Maglangit wala motungha sa iyang pwesto nianang gabhiuna ug mihangyong magpapuli una sa pagbantay sa iyang pwesto, nagtuo si Jumao-as nga giplanuhan na niini ang pagpatay sa biktima nianang tungura.

Si Baguio kasamtangang naglakaw sa maong dapit dihang kalit nga gipusil ni Maglangit gamit ang wala pa matinong kalibre sa armas diha sa tampihak ug milahos ang bala sa agtang, DOA na kini pag-abot sa Lapulapu City Hospital.

Si Maglangit misibat dayon human sa pagpamusil ug padayong gipangita sa kapolisan sa dakbayan sa Lapulapu. – Bong Soriano uban sa report ni Romeo Limpangog (BANAT NEWS)