Lawas patay sa rugby boy giulod

CEBU, Philippines – Usa ka “rugby boy” napalgang gihulmigas ug gipangitkit na sa ulod ang patay'ng lawas niini sulod sa iyang payag sa likod nga bahin sa SOS Village sa barangay Lower Talamban, dakbayan sa Sugbo kagahapon sa buntag.

Ang biktima mao si Richard Damayo alyas Bugoy, hingkod nga taga SOS Village, ug nainila nga manuyopay og rugby.

Matud pa sa kapolisan nga usa ka silingan sa biktima nga si Argie Sagles Taala maoy nakakita sa patay'ng lawas niini nga nagbuy-od sulod sa iyang payag nga nabulit na sa hulmigas ug mga ulod ug maoy mipahibawo sa kapolisan sa Talamban.

Ang kapolisan nga misusi sa lawas sa biktima wala makakita og timailhan nga kini gituyo sa pagpatay.

Ang mga silingan nagkanayon nga niadtong Martes sa buntag nakita pa nila kining nangayo og pagkaon sa ilang mga silingan.

Hinuon ipaubos pa sa autopsy ang lawas sa biktima aron sayron kun may foul play ba o wala ang iyang kamatayon. – Lesley Caminade (BANAT NEWS)