Nagluto'g pamahaw sa anak gipatay

CEBU, Philippines – Gisaka sa balay ug gipusil namatay samtang naghikay sa ilang pamahaw ang usa ka mag-uuma diha sa bukirang bahin sa barangay Anahaw lungsod sa Argao niadtong Lunes sa alas 5:30 sa buntag.

Ang biktima mao si Andres Cambarihan Alburoto, 36, nagpuyo sa maong lugar samtang ang suspek mao si Elominado Omboy Jr., alyas Onyot, kaslunon sa sunod buwan nga ilang silingan.

Matud ni SPO1 Arnold Abenir sa Argao Police dihang nahinabi sa Banat News ang 10-anyos nga anak sa biktima mibutyag nga nagluto ang iyang amahan dihang kalit nga misulod ang suspek ug gidiretso og pusil ang iyang amahan nga nagtalikod niadtong tungura.

Dugang pa sa bata human matumba ang iyang amahan giusban kini pagpusil sa suspek, human siya mabantayi sa suspek gipasalbahan siya niini makaduha ka higayon hinungdan sa iyang pagdagan ug nangayo og tabang sa mga silingan.

Ang biktima dunay samad pinusilan sa luyong bahin sa ulo ug tuong bahin sa lawas samtang wala na igkita ang suspek.

Nasayran usab nga nagkabuwag ang biktima ug inahan sa bata human ikiha sa asawa ang biktima og pagpangulata kanila, apan gituohang motibo sa kapolisan mao ang kasuko sa suspek nga gibawian og kabaw sa biktima.

Gikatahong ang maong kabaw iya sa magtiayon ug dihang nagkasungiay gikuha kini sa asawa sa biktima ug gipagamit ngadto sa suspek apan gibakwi kini sa gipatay. – Darrel Carumba (BANAT NEWS)