Blangko pa ang Talisay police

CEBU, Philippines – Blangko pa ang kapolisan sa dakbayan sa Talisay pag-ila sa tulisang mipatay sa 20-anyos nga nursing student niadtong Domingo sa gabii diha sa Victoria Village, barangay Tabunok, Talisay.

Si PO1 Jundave David sa Talisay City Police Station uban kang PO2 Roelito Tano kinsa maoy nag-imbestigar sa maong kaso mibutyag kagahapon sa Banat News nga tulis gyud ang motibo sa pagpusil patay kang Dennis Krisstofer Bago.

Si Bago nga residente sa nahisgutang lugar ug usa ka nursing student sa Cebu Normal University (CNU) gikan pa misimba ug samtang naglakaw gikatahong nagpunay og text sa iyang cellphone dihang kalit nga gipusil sa tulisan.

Matud ni David nga nawagtang ang Nokia 5310 cellular phone sa biktima nga gidala niini samtang misimba.

Matud usab ni David nga dunay posibilidad nga nagdumili si Bago sa paghatag sa iyang cellphone ngadto sa nahisgutang tulisan hinungdan nga kini gipusil.

Ang tulisan ang gikataho usab nga dunay laing kuyog nga nagmaneho sa asul nga motorsiklo nga naghuwat lang sa unahan ug human sa pagpusil daling misakay sa nahisgutang motorsiklo ang mamumuno ug mipalayo sa lugar.

Si Bago nakaangkon og samad pinusilan sa dughan daling gidala ngadto sa Talisay City District Hospital apan wala na kini makaabot nga buhi diha sa nahisgutang tambalanan. – Brenda Batuto (BANAT NEWS)