CEBU, Philippines - Nasikop sa mga tinugyanan sa Provincial Intelligence Branch (PIB) ang usa ka idlas nga masiao coordinator sa dakbayan sa Danao niadtong Sabado sa gabii.
Si Chief Insp. Ma. Elma Delos Santos, hepe sa PIB miila sa dinakpan nga si Ponciano Mendoza, 38, taga barangay Poblacion, dakbayan sa Danao, samtang ang asawa niining si Amalia, 42, kinsa mikabad og dagan pag-abot sa mga otoridad sa ilang balay, nagpabilin pang wala hidakpi.
Si Delos Santos mibutyag sa Banat News nga samtang naghatod na sila sa search warrant nga giluwatan ni judge Gabriel Englis, sa Regional Trial Court branch 58, para kang Mendoza, ila kining nakit-an nga nagsakay na sa iyang sakyanan diha sa gawas sa ilang balay kay adunay lakaw.
Busa dihadiha ila kining gipara ug gitunol ang search warrant dihang nakita nila ang mga binandol nga masiao tally sheets nga may mga number combination, tulo ka calculator, unom ka ballpen, ug ang P39,230 mil pesos nga halin sa masiao, sa sulod sa van ni Mendoza.
Hinungdan nga gisignit dayon nila si Mendoza, apan ang asawa niining si Amalia nga nakanbantay sa mga polis, wala na modayon og sakay sa ilang sakyanan ug mikaratel kini og dagan agi sa luyong bahin sa ilang balay aron pag-ikyas busa wala kini masikop. – BANAT NEWS