Mayor Gungob ikiha

CEBU, Philippines – Pasakaan gyud og kaso sa kagamhanan sa probinsiya sa Sugbu si Consolacion Mayor Avelino Gungob tungod sa giingong pagpadayon sa iyang illegal quarrying operation sa iyang lungsod.

Si Provincial Atty. Mariano Martinquilla nagkanayon nga nakadawat na siya og kamanduan gikan sa buhatan ni Governor Gwendolyn Garcia nga ikiha gyud si Gungob tungod sa pagsalikway niini sa pahimangno nga undangon ang illegal quarrying nga iyang gipasiugdahan.

Matud pa ni Martinquilla nga bisan og gipangsikop na ang mga dump truck sa munisipalidad tungod sa paghakot og filling materials gikan sa quarrying operation nga walay Environmental Compliance Certificate kon ECC gikan sa DENR.

Nipahibawo si Martinquilla niadtong nakalabay nga bulan si Gungob nihangyo sa gobernadora nga buhian ang truck nga gisikop ug gibuhian kini uban ang pasalig nga undangon ang illegal quarrying apan nipadayon lamang kini gihapon.

Gani niining bag-o ubay-ubay na nga mga trak de karga ang mga nasakmit sa mga sakop sa Provincial Environment and Natural Resources Office kon PENRO.

Ang naasoy nga Provincial Attorney mitumbok nga nagpaabot na lamang siya sa report nga ihatag unya sa PENRO aron maoy iyang basehanan sa tukmang kaso nga ipasaka batok sa mayor sa Consolacion. – BANAT NEWS