CEBU, Philippines – Usa ka motorsiklong nawad-an og kontrol ang menor de edad nga drayber ug misampak sa usa ka dakong punoan sa kahoy nga miresulta sa kamatayon sa iyang angkas diha sa North Ginabasan barangay Tubigag-Manok lungsod sa Asturias niadtong Huwebes sa alas 12:30 kagahapon sa sayong kaadlawon.
Ang namatay mao ang angkas nga si Neil Maambong, 20, usa ka estudyante ug molupyo sa Sta. Lucia sa lungsod sa Asturias samtang kritikal ang kahimtang sa drayber nga si Joven Roque Bantilan, 17, usa ka high school student sa maong lungsod ug molupyo gihapon sa maong lugar.
Matud ni PO1 Josephus Montesclaros sa Asturias Police dihang nahinabi sa Banat News, ang mga biktima gikan sa lungsod ug nag-inom kauban ang mga barkada ug paingon na untang mamauli niadtong tungura.
Subay sa imbestigasyon sa kapulisan giingong medyo kusog ang pagpadagan sa mga biktima sa motor ug kalit nga nawad-an og preno ang drayber dayon mitipas sa pikas nga linya hangtud nga mibangga sa dakung puno-an sa kahoy daplin sa karsada.
Ang mga tawo na nga diha sa hitabo mao nay mitabang kanila pagdala sa Balamban District Hospital apan gideklarar nga dead on arrival ang angkas nga si Maambong tungod sa dakung kadaut nga nahiaguman sa iyang ulo dihang nabanda kini sa punoan sa kahoy, kritikal usab ang kahimtang sa minor de edad nga drayber. – Darrel Carumba (BANAT NEWS)