Nanulis sa indian gikulata

CEBU, Philippines – Bun-og sa nagkadaiyang parte sa kalawasan ang nahiaguman sa usa ka tulisan human kini madakpi sa kapolisan sa dihang gitulis niini ang usa ka negosyanteng Indian niadtong Martes sa alas 6:45 sa gabii diha sa Atillo Road, barangay Punta Princesa ning dakbayan.

Ang gibalhog sa Punta Princesa Police Station giila sa kapolisan nga si Danilo Limotan, 43, taga Sitio Tanay, barangay Pulangbato ning dakbayan. Nakaipsot sa kapolisan ang kauban niini nga nailang si Allan Tejano, 30, taga Sitio Kalubihan, barangay Talamban.

Si Sr. Insp. Elberto Abellar, hepe sa Punta Princesa Police Station nga gikahinabi sa Banat News nagkanayon nga ang gitulis nila ni Limotan ug Tejano mao ang Indian   nga si Jatinder Kumar, 32, naminyo ngadto sa Pilipina ug nagpuyo sa nahisgutang dapit.

Matud pa ni Sr. Insp. Abellar nga sa dihang gi-parking na unta ni Kumar ang iyang bag-ong motorsiklo sa ilang panimalay kalit lang naabot si Limotan nga midasmag niini ug mideklarar og tulis.

Apan si Kumar misukol nilang Limotan ug Tejano ug giswerte tungod kay wala makabuto ang .38 nga relbolber nga gidala niini ug nahitabo ang ilang sinumbagay hinungdan nga ang asawa niini nga wala hinganli daling migawas sa ilang panimalay ug mitabang sa iyang bana.

Matud pa nga si Limotan nga wala makabantay sa asawa ni Kumar nga nagdalag helmet sa motorsiklo mipuspos sa ulo niini hinungdan nga   si Limotan nalipong. Si Tejano kinsa nakakita sa sitwasyon naratol ug wala na makapadagan sa ilang motorsiklo ug ang motor na hinuon sa biktima maoy gidala gumikan kay nakatangag pa ang yawe niini hinungdan nga nakasibat.

Ang mga silingan didto sa dapit nga nakabantay sa komosyon nagtuong nag-away ang mga Indian tungod kay ang hulagway ni Limotan susama usab og Indian hinungdan nga nanawag og mga polis.

Matud pa niini nga nakaangkon og samad sa ulo ug mga pangos ug bun-og sa lawas human gitabangan og kulata sa mga estambay si Limotan, samtang   si Kumar nakaangkon usab og samad sa ulo human gibunalan sa armas.

Hinuon walay nakuhang salapi ang mga tulisan kini tungod kay ang magtiayong Kumar gikan kini sa Colon nga nagkuha sa mga papeles sa ilang motorsiklo nga usa ka semana pang gipalit.

Gikataho nga nakabantay ang biktima nga ang duha ka mga suspetsado nagsunod-sunod na nilang daan sa Natalio Bacalso Avenue sa wala pa mahitabo ang krimen.

Nakuha sa kapolisan ang. 38 rebolber ni Limotan ug ang upat ka mga buhing bala niini ingon man ang motorsiklo niini nga gibilin. Kasong robbery ipasaka sa kapolisan batok sa duha. – BANAT NEWS