CEBU, Philippines – Usa ka suspetsadong tulisan ug nangangkong sakop sa Alpa Kappa Rho (AKRHO) ang nasikop ug nakuhaan og armas kagahapon sa kaadlawon sa Carmen Village, barangay Poblacion, dakbayan sa Talisay.
Si Miko Taguera, taga barangay Sinsin, dakbayan sa Sugbo nasikop nila ni PO3 Mikie Espina, PO2 Roelito Tano ug PO1 Jundave David samtang nagpatrolya diha sa maong lugar.
Sumala pa sa kapolisan naatlan nila si Taguera nga naglakaw sa maong dapit nga nabitbit og usa ka kalibre .38 nga revolver ug dihang ilang gisitar ug gidisarmahan nasuta nga kargado kini og unom ka buhing bala. Nagduda ang mga polis nga posibleng dunay plano si Taguera nga manulis nianang tungura diha sa maong lugar apan naatlan lang sa kapolisan.
Si Supt. Henry Biñas, hepe sa kapolisan sa siyudad sa pakighinabi niini sa Banat News kagahapon mibutyag nga si Taguera gitumbok sa usa ka 16-anyos nga drayber sa traysikad.
Matud ni Biñas nga gitulis ni Taguera niadtong Biyernes ang maong 16-anyos diha sa barangay Tabunok ug nadala niini ang 3310 cellphone sa biktima.
Gikatahong nakaila ang biktima sa suspek ug nakahibalo kun diin kini magpunduhan, dihang giadto kini sa batan-on aron ipauli ang cellphone gikatahong giingnan lang siya niini nga ipalukat kini og P500 una pa niya kini iuli.
Gumikan niini misumbong ang batan-on sa mga polis apan kagahapon sa kaadlawon naatlan si Taguera ug nadakpan ug dihang gisukit-sukit nahibaw-an nga siya sad diay ang mitulis sa maong batan-on. - Brenda Batuto (BANAT NEWS)