Law-ay'ng salida gukdon sa Anti-Indecency Board

CEBU, Philippines – Subling hingusgan sa Cebu City Anti-Indecency Board (CAIB) ang kampanya niini batok sa mga pornographic materials ingon man sa mga malaw-ay’ng pasundayag sa nagkadaiyang mga balay kahilayan sa dakbayan.

Kini tungod sa subli nang pagbukas sa klase diin gipaabot nga musiaw na usab ang ubang mga night spots sa siyudad sa ilang naandan nga kalihukan.

Matud sa chairman sa CAIB nga si Dr. Rene Josef Bullecer nga sagad sa mga balay kahilayan sa dakbayan mohimo og mga gimik niining panahuna

Sa samang higayon miingon si Bullecer nga moluag usab ang mga regulasyon nga gipatuman sa nagkadaiyang mga imnanan ug uban pa kay mao kini ang mentalidad ug estratehiya sa mga badlongon nga sa pagsugod sa klase ngadto sa ikatulong semana maoy panahon sa ilang pagsiaw.

Lakip sa gipasabot sa CAIB chairman mao ang pagpahubo sa mga dancer samtang magsayaw sa entablado diha sa mga balay kahilayan ug uban pa.

Namatikdan usab ni Bullecer nga misiaw karon ang mga pirated pornographic DVD ilabi na ang kontrobersyal nga Hayden Kho-Katrina Halili sex scandal.

Subay niini miingon siya nga iyang pakigtagboan si Mayor Tomas Osmeña aron pahibaw-on sa ilang mga plano.

Gusto ni Bullecer nga patabangon sa ilang kalihukan ang mga barangay kapitan partikular na sa mga urban barangay sa siyudad nga dunay mga balay kahilayan.

Kini tungod kay ang kapulisan sa dakbayan daghan usab og mga gimbuhaton ilabi na sa natad sa siguridad sa siyudad.

Hangyuon sa CAIB chairman si Osmeña nga maoy moawhag sa mga barangay kapitan nga mohimo usab og mga lakang batok sa pornograpiya. - Elly Bolonos (BANAT NEWS)