Nerez maoy gusto ni Garcia sa PRO-7

CEBU, Philippines – Ang kanhi hepe sa Cebu City Police Office (CCPO) ug karun atua na madestino sa Camp Crame nga si Chief Supt. Lani-O Nerez maoy napilian ni Gobernador Gwendolyn Garcia nga maoy mohulip kang Chief Supt. Federico Terte sa Police Regional Office-7.

Si Terte gikatakdang moretiro karong adlawa atol sa turn-over of command karung alas 3 sa hapon sa Camp Sergio Osmeña Sr. nga saksihan ni PNP Chief Jesus Verzosa.

Si Terte wala motug-an sa pangutana kaniya sa mga sakop sa media kun si Nerez na ba gyud ang mopuli kaniya karung adlawa.

Si General Terte nahimong pangulo sa PRO-7 kapin sa tulo ka buwan hulip kang Chief Supt. Ronald Roderos kinsa atua na karun sa Camp Crame.

Sumala pa ni Garcia nga lima ka mga pangalan sa opisyal ang gipapilian kaniya lakip na niini si Nerez ug ang naulahi maoy iyang gipili tungod kay nasuhito na kini sa mga Sugboanon gawas nga nadestino kaniadto dinhi, ang asawa usab niini usa ka Sugbuanon.

Matud sa gobernador nga nakadayeg siya sa performance ni Nerez dihang mao pay naglingkod nga hepe sa Cebu City Police Office ug gani daghang mga local officials ang nakauyon kaniya.

I-endorsar usab sa gobernador ngadto kang Versoza si Sr. Supt Jesus Gaquing Sr. isip puli kang Sr. Supt. Carmel Valmoria diha sa CPPO, si Valmoria tua na madestino sa Police Community Relations Group (PCRG) sa Camp Crame. Gihulagway ni Garcia si Gaquing nga “best man” tungod sa track record niini ug gani iyang gidayeg ang maong opisyal tungod sa kasinatian niini sa panerbisyo hinungdan nga duna siyay pagsalig niini.

Tulo ka mga pangan nga pulos nagranggo og Senior Supt. nga sila si Dennis Acre Siedo ug Ricky Nas Nerbes lakip si Gaquing ang gipapilian sa PRO-7 kang Garcia.

Gipirmahan ni Garcia kagahapon ang iyang request alang kang Gaquing aron pormal nga iduso sa buhatan ni Terte ug sulod sa napulo ka adlaw mahibaw-an na kun kanus-a ang turnover of command diha sa CPPO. - Rey Pasaporte ug Chester Abadilla (BANAT NEWS)