CEBU, Philippines – Nadisturbo kagahapon ang gihimong Senate public hearing sa Senado may labot sa sex video scandal nila ni Dr. Hayden Kho ug Katrina Halili human kalit giyab-a'g tubig ang doktor ni Pagsanjan, Laguna ex-mayor Abner Afuang.
Tuyo unta sa maong hearing mao ang pag-ila kung si kinsa ang m-upload sa maong video diha sa internet ug aron usab kahimoan og mga balaod aron maprotektaran ang kababayen-an ug uban pang mga posibleng biktima pinaagi niini.
Ang maong kaguliyang nahilom ra dayon human giaresto si Afuang sa mga magbalantay sa maong hearing subay sa kamandoan ni Sen. Maria Ana “Jamby” Consuelo Madrigal. Nasutang may “press ID” si Afuang maong nakasulod kini.
Sa balita sa ABS-CBN News Channel kagahapon ang inahan ni Kho nagkara-karang mitrapo sa nabasang ulo sa iyang anak samtang gikuyugan paggawas sa session hall si Afuang.
Sa maong hearing daw mas interesado ang mga senador partikular na si Madrigal nga ilhon kun hinganlan ni Kho ang giingong tig-supply kanila sa ecstacy nga ilang gigamit ni Katrina.
Apan si Kho makadaghang higayong mihangyo nga di niya kini mahimo gumikan kay gibaharan na siya ug ang iyang pamilya nga di kini ibutyag kung di kini gustong dunay dautang mahitabo kanila.
Si Kho daw nagpanghadlok nga nagpanglingi sa luyo ug sa palibot samtang padayong mihangyong di niya mahinganlan ang maong tawo gumikan kay nahadlok siyang posibleng duna kini mga sakop diha sulod sa public hearing.
Si Madrigal mipahibalo sa maong hearing nga nakadawat siya og impormasyong ang sex video gibaligya ngadto sa usa ka impluwensyadong tawo ug maoy mi-upload niini sa internet kini giingong involved sa drugs.
Giangkon ni Kho nga duna sila’y sex video sa kanhi niya uyab nga si Dra. Vicky Belo apan dili siya segurado kung nikatap na ba kini karon.
Gidudahan usab ni Kho nga posibleng ang mga kanhi niya nga mga higala nga sila si Erik Chua ug Bistek Rosario maoy nagpakatap sa videos sanglit mao man kini ang nagkuha sa iyang hard disc diin naka-save ang videos.
Subling gibarugan ni Kho nga si Katrina ang hinungdan nga na-adik siya sa ecstacy butang nga gihimakak sa aktres.
Matud pa sa doktor nga niadtong August 2007 nagsugod ang ilang relasyon ni Halili ug mipasangil nga ang dalaga pay maoy nag-una una og text aron mosuway og ecstacy.
Nabutyag usab diha sa maong hearing nga ang nahibaw-an lang ni Halili nga video nga gikuha ni Kho di sex video, ug ang migawas nga sex video walay kalibutan si Halili niini.
Gibutyag usab ni Halili nga wa siya’y kalibutan nga dunay camera nga gibutang ni Hayden pero miinsister gyud ang doktor nga kabalo ang aktres sa maong butang. - Sanden Anadia (BANAT NEWS)