Hepe sa Sibonga police girelibuhan sa pwesto

CEBU, Philippines – Girelibuhan na niadtong miaging adlaw si Sr. Insp. Noli Cernio isip hepe sa kapulisan sa lungsod sa Sibonga Police Station human gi-imbestigar gumikan sa pasangil nga midawat og suborno sa ilang dinakpan sa illegal possession of firearm.

 Sumala pa ni Supt. Erson Digal ang Officer-In-Charge (OIC) sa Cebu Provincial Police Office (CPPO) niadto pang hapon sa adlaw’ng Lunes si Sr. Insp. Cernio gipabalhin sa Operation Section sa CPPO samtang magpadayon ang kaso niini.

Sumala pa ni Digal nga imbestigahon kini tungod sa neglect of duty nga iyang ipasaka batok sa maong opisyal human masuta sa Provincial Investigation and Detective Management (PIDM) nga may mga kasaypanan kini.

Nasuta sa mga imbestigador nga napakyas ang Sibonga Police Station sa pagduso’g spot report sa headquarters kalabot sa akusadong si Benjie Licaylicay nga giingong ilahang nadakpan tungod sa paghupot og armas.Samtang nakita usab sa mga imbestigador nga ang kasong illegal possession nga gipasaka batok sa akusado gibutang nga detained kini human madakpi niadtong Mayo 9.

Apan nahibaw-an sa PIDMB nga niadto pang Domingo gibuhian sa kapulisan sa Sibonga ang suspek ug pagka- Mayo 11 na gipasakaan og kaso.Sa tukmang proseso, ang usa ka dinakpan di mahimong mabuhian kung di mapasakaan daan og kaso ug mapresentar sa piskalya, siya mahimo lang buhian kun makabutang og piyansa.

Matud pang Digal, naglisod na sila pagpangita karon kang Licaylicay ug buot nilang manubag niini si Sr. Insp. Cernio. - Guam Logroño (BANAT NEWS)