2 batan-on gipusil

CEBU, Philippines – Samdan ang duha ka batan-on sa dihang gipaulanan og bala sa grupo sa laing batan-on kagahapon sa kaadlawon sa Tomlyn Compound sa Katipunan Street, barangay Tisa.

Ang nangasamdan mao sila si Adrian Pugoy,18,taga sitio Lutaw-lutaw ug Jeffrey Dinglasa, 24, usa ka pintor, usa sa mga gitumbok nga mipusil kanila mao si Jonas Decena Abañes,20, taga sitio Kallehon sa barangay Labangon human kini madakpi.

Samtang lain pang pito ka mga kauban ni Abañes ang gipangita pa sa kapolisan kansang mga pangalan wala pa usab mailhi.

Sa imbestigasyon sa kapolisan ang mga biktima uban sa laing mga barkada nanglakaw diha sa maong dapit dihang kalit nangabot ang suspek ug kaubanan ug walay daghang pangutana gipusil sila sa grupo.

Si Pugoy naigo sa ulo samtang si Dinglasa naigo usab sa wala nga bahin sa iyang lawas. Samtang nadakpan dayon si Decena. - Lesley Caminade (BANAT NEWS)